Umuhanzi Waje uzaririmba mu gitaramo cya Kigali Juzz Junction yageze i Kigali
Mu ijoro ryo kuri uyu wa Kabiri tariki ya 25 Nzeri, Aituaje Aina Vivian Ebele Iruobe wamamaye nka Waje muri muzika ufite inkomoko muri Nigeriya yageze i Kigali aho aje gutaramira abazitabira igitaramo cya Kigali Juzz Junction azahuriramo na Muyango.
Yageze ku kibuga cy’indege Mpuzamahanga cya Kigali i Kanombe ku isaha ya saa tatu z’ijoro yakirwa n’abategura ibitaramo bya Kigali Juzz Junction. Agiye guhurira mu gitaramo gikomeye cya Kigali Jazz Junction n’umunyarwanda Muyango Jean Marie waharaniye iterambere ry’umuziki gakondo ndetse akaba ari umutoza mukuru w’itorero ry’igihugu “Urukerereza”.
Waje yaririmbye mu ndirimbo zitandukanye, nk’iya P Square yitwa “Do me”; yanumvikanye mu ndirimbo “Coco Baby” yahuriyemo n’umunyamuziki Diamond Platinumz, yahuriye na Patoranking mu ndirimbo bise “Left For Good”, anafitanye indirimbo na Tiwa Savage bise “Onye”, yanakoranye kandi indirimbo na Yemi Alade bise “Am Available” n’izindi.
Igitaramo cya Kigali Jazz Junction kizaba tariki 28 Nzeli 2018 kibere muri Kigali Serena Hotel mu mujyi wa Kigali. Kizatangira saa mbiri z’umugoroba (8PM), kwinjira ni ibihumbi icumi (10,000 Rwf) mu myanya isanzwe, ubashije kugura tike mbere ni ibihumbi bitanu (5000 Rwf), mu myanya y’icyubahiro (VIP) ni ibihumbi makumyabiri (20,000 Rwf) mu gihe kuri Table y’abantu 8 ari ibihumbi 160 Rwfs.
