Perezida Kagame yagiranye ibiganiro na Macron i Paris(Amafoto)
Pe
rezida Paul Kagame yagiranye ibiganiro na Perezida w’u Bufaransa, Emmanuel Macron, mu nama yabereye ku Ngoro y’Umukuru w’Igihugu cy’u Bufaransa, Élysée Palace, i Paris.
Ibiganiro by’abakuru b’ibihugu byombi byibanze ku gukomeza umubano hagati y’u Rwanda n’u Bufaransa, guteza imbere ubufatanye mu nzego zitandukanye ndetse no kungurana ibitekerezo ku bibazo bireba akarere ndetse n’imibanire mpuzamahanga.
Village Urugwiro yatangaje ko Perezida Kagame yakiriwe na Macron mu gitondo cyo ku wa 11 Nzeri 2026, mu ruzinduko rw’akazi yagiriye mu Bufaransa.
Kagame yari yagiye i Paris kwitabira International Space Summit, inama mpuzamahanga yibanze ku iterambere ry’urwego rw’iby’isanzure. Iyi nama yabaye ku wa 9 no ku wa 10 Nzeri 2026, itegurwa ku bufatanye bw’u Bufaransa n’u Budage.
Yahuje abayobozi b’ibihugu na za guverinoma, inzego mpuzamahanga, ibigo bikora mu by’isanzure, abashakashatsi n’abahanga mu bya siyansi ndetse n’abahagarariye abikorera.
Abitabiriye iyi nama baganiriye ku cyerekezo cy’urwego rw’iby’isanzure, harimo uruhare rw’ubukungu bushingiye ku isanzure, guteza imbere ubushakashatsi n’ikoranabuhanga ndetse no gukoresha umutungo n’ibikorwaremezo byo mu isanzure mu buryo burambye.
Umugabane wa Afurika na wo wahawe umwanya muri ibyo biganiro, hibandwa ku buryo ibihugu by’Afurika byakoresha ikoranabuhanga ry’isanzure mu guteza imbere siyansi, ikoranabuhanga n’ubukungu, ndetse no kugira uruhare mu ishyirwaho ry’amategeko n’amabwiriza mpuzamahanga agenga uru rwego.
Uruzinduko rwa Perezida Kagame mu Bufaransa rubaye mu gihe u Rwanda rukomeje gushimangira ubufatanye mpuzamahanga mu by’ubumenyi, ikoranabuhanga n’ubushakashatsi, nk’imwe mu nzira zo guteza imbere ubukungu bushingiye ku bumenyi.
