Miss Supranational: Ntabwo byifashe neza kuri Uwase Tina uhagarariye u Rwanda

Uwase Clementine uzwi nka Tina uhagarariye u Rwanda mu irushanwa rya Miss Supranational 2018 ntiyabonetse mu bakobwa bazi kwerekana imideli n’ubwo asanzwe abikora nk’umwuga umunsi ku wundi.

Ku mugoroba wo ku wa 02 Ukuboza 2018, mu irushanwa rya Miss Supranational, kuri Hoteli yitwa Gołębiewski Karpacz muri Pologne, habereye agace ko kurushanwa mu kumurika imideli (Top Model Competition).

Aka ni kamwe mu duce tugaragaza abakobwa bagomba kuzahatanira ikamba ku munsi wa nyuma w’irushanwa.

Nyuma yo gutambuka imbere y’akanama nkempurampaka, umukobwa ukomoka muri Brésil niwe wegukanye ikamba ry’uwahize abandi mu kumurika imideli, ahita abona amahirwe yo kuzahatanira ikamba ku munsi wa nyuma.

Hagendewe ku migabane n’ubundi Barbara Reis niwe wahize abo muri Amerika y’Epfo, Maddison-ClareSloane uhagarariye Austaria ahigika abo ku mugabane wa Oceania, Medeline Phelizor aba uwa mbere mu bihugu bya Carraibe, Wilda Octaviana Situnkir wo muri Indonesia arusha abo muri Aziya.

Margarita Martyanova wo muri Belarus yarushije abandi bo ku mugabane w’u Burayi, mu gihe Maria Lucrecia Nve Maleva wo muri Guinée équatoriale yarushije abandi bo ku mugabane wa Afurika.

Umunyarwandakazi Uwase Clementine ntabwo yabashije kwitwara neza muri iki gice.

Mu tundi duce tugize iri rushanwa, Eunbi Lee ukomoka muri Koreya yahigitse abandi mu kwerekana impano aho yaririmbye indirimbo ya Beyonce yitwa ‘Work It Out’.

Mbere y’uko ibirori bisoza irushanwa biba, abakobwa bagera kuri 70 bahagarariye ibihugu byabo berekanye imideli hanatangwa amanota, n’ubwo Tina asanzwe abikora ntiyabonetse mu bazi kubikora neza.

Kugeza ubu, muri iri rushanwa u Rwanda ruhagarariwe na Uwase Clementine ruri ku mwanya wa 53, n’amanota 2,1. Pologne niyo iri ku mwanya wa mbere n’amanota 25.

Iri rushanwa rizasozwa ku wa 07 Ukuboza 2018 hamenyekana uzasimbura Kim Jenny wari ufite iri kamba.

Abatsinze:

Miss Top Model 2018: Barbara Reis – Miss Supranational Brazil 2018
Miss Supramodel of the Americas 2018: Barbara Reis Miss Supranational Brazil 2018
Miss Supramodel Africa 2018: Maria Lucrecia Nve Maleva Miss Supranational Equatorial Guinea 2018
Miss Supramodel Oceania 2018: Maddison-Clare Sloane 
Miss Supramodel Europe 2018: Margarita Martynova Miss Supranational Belarus 2018 
Miss Supramodel Asia 2018: Wilda Octaviana Stinkur Miss Supranational Indonesia 2018 
Miss Supranational Caribbean 2018: Mideline Phelizor Miss Supranational Haiti 2018