Kwibuka 32: Rennes yakiriye urugendo rwa mbere rwo Kwibuka Jenoside yakorewe Abatutsi

Ku wa 18 Mata 2026, umujyi wa Rennes mu Bufaransa wakiriye ku nshuro ya mbere urugendo rwo kwibuka Jenoside yakorewe Abatutsi mu 1994, mu rwego rwa Kwibuka ku nshuro ya 32 (Kwibuka32).

Iki gikorwa cyateguwe n’Abanyarwanda batuye mu Bufaransa ku bufatanye n’imiryango itandukanye, kikaba ari intambwe ikomeye mu kwimakaza urwibutso n’amateka muri uyu mujyi. Kigamije gushimangira ukwibuka, guhererekanya amateka, no kurwanya abapfobya Jenoside.

Umunsi watangiranye igikorwa cyo kwibuka cyaranzwe n’ituze n’icyubahiro, gikurikirwa n’urugendo rwanyuze mu mihanda itandukanye y’umujyi wa Rennes. Abacyitabiriye bibutse abazize Jenoside mu mwuka w’ubumwe, ituze n’agahinda, bagaragaza ko kwibuka ari inshingano ihoraho.

Uru rugendo rwa mbere rufite igisobanuro gikomeye ku Banyarwanda batuye muri uyu mujyi, bamaze imyaka bashaka ko amateka ya Jenoside yakorewe Abatutsi ashyirwa mu ruhame ndetse akamenyekana ku buryo burambye.

Abayobozi batandukanye bo mu nzego z’ibanze bitabiriye iki gikorwa banatanga ubutumwa bushimangira akamaro ko kwibuka no guhererekanya amateka.

Madamu Marie Mesmeur, umudepite uhagarariye agace ka mbere ka Ille-et-Vilaine, hamwe na Madamu Valérie Kerauffret, umuyobozi wungirije w’Umujyi wa Rennes, bagaragaje ko kwibuka Jenoside yakorewe Abatutsi ari inshingano ya buri wese, cyane cyane mu kurwanya ingengabitekerezo ya Jenoside.

Hari kandi undi muyobozi ushinzwe umurage n’urwibutso mu mujyi wa Rennes witabiriye igice cya mbere cy’igikorwa, agirana ibiganiro n’abateguye iki gikorwa, anemeza ko umujyi witeguye gukorana nabo mu mushinga wo kubaka urwibutso rwa Jenoside yakorewe Abatutsi muri uyu mujyi.

Kimwe mu byaranze uyu munsi ni icyemezo cyagaragajwe n’abayobozi cyo gushyigikira umushinga wo kubaka urwibutso rwa Jenoside yakorewe Abatutsi i Rennes. Abateguye iki gikorwa bagaragaje ko ari intambwe ikomeye, kuko gushyira amateka mu ruhame bifite agaciro kanini ku barokotse, imiryango yabo, ndetse n’abazaza.

Uyu mushinga uzafasha gukomeza kubungabunga amateka no kurwanya kwibagirwa no gupfobya Jenoside.

Abateguye iki gikorwa banagarutse ku mbogamizi zikigaragara muri iki gihe, zirimo abapfobya Jenoside bakoresha imbuga nkoranyambaga ndetse n’abagerageza kugoreka amateka. Banavuze ku bibazo byugarije Abatutsi batuye mu Burasirazuba bwa Repubulika Iharanira Demokarasi ya Congo, bagaragaza ko ari ngombwa gukomeza kuba maso no kurwanya urwango n’ihohoterwa.

Iki gikorwa cyahuje Abanyarwanda batuye mu Bufaransa n’inshuti zabo, hamwe n’imiryango itandukanye ndetse n’inzego z’ibanze, kigamije gukomeza kwimakaza umuco wo kwibuka, kwigisha amateka no kuyashyira mu buzima busanzwe bw’umujyi wa Rennes.

Umuyobozi w’Abanyarwanda baba mu Bufaransa, Christophe Renzaho, yabwiye Teradignews ko iki gikorwa cyagenze neza cyane kandi cyitabiriwe n’abantu benshi barimo n’abanyamahanga.

Yagize ati: “Byagenze neza cyane, abantu bitabiriye ari benshi kandi harimo n’abanyamahanga bifatanyije natwe muri iki gikorwa cyo kwibuka.”

Yakomeje avuga ko ubuyobozi bw’u Bufaransa bwabafashije cyane mu kubacungira umutekano, cyane cyane mu gihe cy’urugendo rwo kwibuka rwanyuze mu mihanda y’umujyi.

Ati: “Abashinzwe umutekano badufashije cyane, umuhanda warafunzwe ibinyabiziga birahagarara kugeza urugendo rurangiye, bituma dukora iki gikorwa mu mutuzo n’umutekano usesuye.”

Iki gikorwa cyo ku wa 18 Mata i Rennes cyabaye intambwe ikomeye mu kwimakaza urwibutso rwa Jenoside yakorewe Abatutsi mu ruhame. Abateguye iki gikorwa bagaragaza ko bagiye gukomeza uyu murongo, cyane cyane mu gushyira mu bikorwa umushinga wo kubaka urwibutso, hagamijwe guha agaciro abazize Jenoside, guha icyubahiro abayirokotse no gukomeza guhererekanya amateka ku bisekuru bizaza.