Kiyovu Sports yatandukanye n’umutoza Mark Harrison
Ikipe ya Kiyovu Sports yamaze gutandukana n’umutoza w’Umwongereza Mark Harrison, nyuma yo gutoza iyi kipe mu mikino itatu ya mbere ya Shampiyona y’u Rwanda 2026/27.
Ubuyobozi bwa Kiyovu Sports bwemeje ko Harrison atakiri umutoza w’iyi kipe, ariko ntibwatangaje ku mugaragaro impamvu nyamukuru yatumye amasezerano yabo aseswa.
Harrison yari yarageze muri Kiyovu Sports muri Kanama 2026, ahabwa inshingano zo gufasha iyi kipe kongera umusaruro no guhatanira imyanya myiza muri shampiyona.
Nubwo yari yatangiye neza ayihesha FERWAFA Super Cup 2026 nyuma yo gutsinda Police FC igitego 1-0 ku mukino wa nyuma, urugendo rwe muri shampiyona rwarangiye nyuma y’imikino itatu.
Amakuru atandukanye avuga ko gutandukana kw’impande zombi bishobora kuba bifitanye isano n’ibibazo by’amikoro bimaze igihe bigaragara muri Kiyovu Sports. Harrison ngo yari amaze iminsi asaba ko ibibazo by’imishahara n’ibindi bireba abakinnyi n’abakozi bikemurwa kugira ngo ikipe ibashe kwitwara neza.
Nyuma y’imikino itatu, Kiyovu Sports iri ku mwanya wa 11 n’amanota atatu. Yatsinzwe na Gorilla FC na Musanze FC, mbere yo kubona intsinzi kuri Bugesera FC.
Umukino ukurikira wa Kiyovu Sports uzayihuza na Marine FC ku wa Gatandatu, aho izaba iri mu gushaka kongera amanota nyuma yo gutandukana n’umutoza wayo.
