Umuraperi Kanye West yayoboye amasengesho yo gusabira Kobe Bryant n’umukobwa we (Amafoto)
Umuraperi Kanye West ukomeye mu muziki wo muri Leta zuzne ubumwe za Amerika, yifatanyije n’inshuti n’abavandimwe mu muhango wo gusabira nyakwigendera Kobe Bryant n’umukobwa we Gianna Maria-Onore Bryant n’abandi bagenzi 7 baherutse kwitaba Imana bazize impanuka ya kajugujugu.
Muri rusange Isi yose yababajwe bikomeye n’urupfu rutunguranye rw’uyu musore wamamaye muri NBA, ari nao mpamvu inshuti n’abavandimwe, ibyamamare bitandukanye ndetse n’abakinnyi bakinanye bahisemo kwihuza bagakora amasengesho amusabira kuzagira ubugingo buhoraho.
Ibyamamare bitandukanye ku isi, byagiye byandika ubutumwa bwo kwihanganisha umuryango we n’abakunzi b’umukino wa Basket babuze umwirabura wafatwaga nk’intwari muri uyu mukino.
Umuraperi Kanye West, yari umwe mu nshuti za hafi za Kobe Bryant, Kanye West usigaye yari yeguriye Imana, yateguye amasengesho yo gusabira imigisha no gusengera uyu mukinnyi wari inshuti ye kugirango azabone ubugingo buhoraho mu ijuru.
Kanye West wari usanzwe ari umufana akaba n’inshuti y’akadasohoka ya Kobe Bryant, ku mugoroba wo kuri uyu wa kabiri taliki 28 Mutarama, yayoboye amasengesho yo gusabira umugisha Kobe Bryant.
Aya masengesho yari ayobowe na Kanye West, uyu muraperi yafashe iminota itanu aririmba indirimbo irimo amagambo asabira umugisha ku Mana, Kobe Bryant, yagarutse kubyaranze uyu mugabo wari inshuti ye, asaba Imana ko yazamuha ijuru ikamutuza ahatunganye hamwe n’umwana we w’umukobwa bapfanye.
Uretse Kanye West wari uyoboye aya masengesho, muri uru rusengero hari harimo Korali nini cyane, yari igizwe n’abahanzi bakomeye nka Kirk Franklin na Chance The Chance The Rapper bifatanyije n’abandi bakristu gusabira umugisha uyu mukinnyi.
