UEFA yasubitse irushanwa rya EURO 2020 kubera coronavirus
Ishyirahamwe ry’umupira w’amaguru i Burayi ryamaze gutangaza ko igikombe gihuza amakipe y’ibihugu yo kuri uwo mugabane “Euro” cyamaze kwimurirwa mu mwaka wa 2021 kubera icyorezo cya Covid-19 Coronavirus cyayogoje isi yose.
Mu nama yahuje umuyobozi wa UEFA,Aleksander Ceferin n’abandi bayobozi b’imikino batandukanye mu bihugu byabo yemeje ko igikombe cya Euro 2020 cyagombaga kuba muri iyi mpeshyi cyimuwe gishyirwa hagati ya taliki ya 1 Kamena na 11 Nyakanga 2021.
Iyi Euro yatumye benshi bibaza uko bizagendekera igikombe cya FIFA Confederations Cup gihuza amakipe y’ibihugu yatwaye ibikombe ku migabane yayo cyagombaga kuba mu mpeshyi y’umwaka utaha.
Ishyirahamwe ry’umuira w’amaguru muri Norway niryo ryabimburiye abandi gutangaza ko Euro yari itegerejwe yimuwe.
Euro y’uyu mwaka yagombaga kuba kuwa 12 kugeza kuwa 12 Nyakanga 2020 ndetse igakinirwa mu bihugu 12 yasubitswe kubera Coronavirus yatumye ibintu byose bihagarara.
Norwegian FA yanditse kuri Tweeter iti “Uefa yanzuye ko Euros yimurwa igashyirwa mu mwaka utaha wa 2021.Izakinwa taliki ya 1 Kamena na 11 Nyakanga 2021.
Amakuru avuga ko UEFA yafashe uyu mwanzuro mu rwego rwo gufasha ibihugu kubona uko bisoza za shampiyona,ibikombe by’igihugu, Champions League na Europa League byahagaze kubera COVID-19.
Imikino ya nyuma ya Champions League na Europa League yongeweho ukwezi aho izaba mu mpera za Kamena uyu mwaka.Copa America 2020 yashyizwe mu mpeshyi ya 2021.
