UCL: Roma yandikiye amateka kuri Barcelona, Liverpool yihaniza Manchester City
Imikino yo kwishyura ya EUFA Champions league yasize AS Roma yandikiye amateka kuri FC Barcelona nyuma yo kuyitsida ibitego 3-0 inayisezerera muri Champions league, mu gihe Liverpool yasezereye Manchester City iyitsinze mu mikino yombi.
FC Barcelona yari yasuye AS Roma kuri Stade Olympique y’i Roma mu mukino wo kwishyura wa EUFA Champions league, nyuma y’umukino ubanza wabereye i Camp Nou muri Espagne bikarangira Barcelona iyinyagiye ibitego 4-1.
Uyu mugoroba, abasore b’umutoza Ernesto Valvelde bagiye i Roma bizeye impamba ihagije, gusa ibyababayeho na bo mpamya y’uko batarabyiyumvisha kugeza magingo aya.
Barcelona yakinaga nk’inaniwe batangiye bayataka, ntibyatinda ku munota wa 07 w’umukino Eden Dzeko aba afunguye amazamu ku ruhande rw’ikipe ya AS Roma. Iki gitego ntacyo cyahinduye ku mikinire ya FC Barcelona yari igifite impamba y’ibitego 2.
Roma yakomeje gusatira, ari na ko ihusha ibitego byinshi imbere y’izamu rya Ander Marc Ter Stegen, gusa igice cya mbere cyarangiye ari igitego 1 cya AS Roma ku busa bwa Barcelona.
Igice cya kabiri cyatangiye AS Roma yotsa igitutu ikipe ya Barcelona, gusa byageze ku munota wa 58 aho Daniel De Rossi yaje gutsindira ikipe ya Roma igitego cya kabiri kuri penaliti nyuma y’ikosa Gerard Pique yari akoreye Eden Dzeko mu rubuga rw’amahina.
Roma yaje kubona ko ibyo gusezerera FC Barcelona bishoboka kuko yasabwaga igitego 1 cyonyine kugira ngo igere muri 1/2 cya Champions league, na yo si ukwataka irasara irasizora.
Ku munota wa 82 inzozi za AS Roma zabaye impamo ubwo Konstantinos Manolas yatsindiraga AS Roma igitego cya gatatu cyatumye amakipe yombi anganya ibitego 4-4, gusa AS Roma ikomeza kubera igitego yatsindiye mu gihugu cya Espagne mu mukino ubanza.
Ku rundi ruhande Liverpool ibifashijwemo na Mohammed Salah ndetse na Roberto Firmino yagiye gutsindira Manchester City kuri El Etihad ibitego 2-1 inahita iyisezerera ku giteranyo cy’ibitego 5-1, dore ko umukino ubanza wari wabereye Anfield warangiye Liverpool inyagiye City ibitego 3-0.
Imikino ya 1/4 cya EUFA Champions league irasozwa kuri uyu wa gatatu Real Madrid yakira Juventus , mu gihe Bayern Munichern iza kwakira FC Seville yo muri Espagne.
