UCL: Lionel Messi atangiranye Ha-trick aba uwa mbere mu mateka watsinze nyinshi

Ikipe ya FC Barcelona itangiye neza imikino y’amatsinda ya UEFA Champions league y’uyu mwaka, nyuma yo kunyagira PSV Eindoven ibitego 4-0 mu mukino Lionel Messi yatsinzemo ibitego 3 byatumye aba uwa mbere mu mateka y’iri rushwanwa washoboye gutsinda ibitego 3 mu mukino umwe incuro nyinshi.

Ni ku ncuro ya 8 Messi atsinze Hat-Trick muri Champions league, mu gihe Christiano Ronaldo yatsinze 7.

Ni umukino wa mbere w’itsinda B ikipe ya Barcelona yari yakiriyemo PSV ku kibuga cyayo cya Camp Nou.

Lionel Messi ni we wafunguriye Barcelona amazamu, kuri Coup Franc yateye ku munota wa 32 umuzamu wa PSV ntamenye ibyabaye.

Iyi Coup- Franc ya Messi ni yo yanjayanye amakipe yombi mu kiruko, n’ubwo ikipe ya PSV na yo yagerageje uburyo buke bwaciye hanze y’izamu.

Ikipe ya Barcelona yagarutse mu gice cya kabiri nanone yataka, gusa ab’inyuma ba PSV bakayibuza kwinjira mu rubuga rw’amahina rwabo. Iyi kipe yo mu gihugu cy’Ubuholandi yihagazeho kugeza ku munota wa 75 ubwo Ousmane Dembele yongeraga kuyibonamo igitego cya 2 cya Barcelona, nyuma yo gucenga abasore 2 agahita atera umupira mu nguni y’izamu.

Nyuma y’iminota 2 Messi yongeye gutsindira Barcelona ikindi gitego, ku mupira yari ahawe na Ivan Raktic.

Lionel Messi yatsinze igitego cye cya gatatu cyari icya kane cya Barcelona ku munota wa 87 w’umukino, ari na cyo cyahise gishimangira Hat-Trick ye y’uyu munsi ari na yo ya 8 amaze gutsinda mu mateka ya UEFA Champions league. Mu wundi mukino w’iri tsinda wabaye, ikipe ya Inter Milan yatsinze Tottenham ibitego 2-1.