Pepeniere, Gicumbi, Miroplast na Sorwathe zahawe amahirwe ya kabiri yo gukina ikiciro cya mbere
Ku munsi w’ejo tariki ya 17 Nzeri, ubuyobozi bw’ishyirahamwe ry’umupira w’amaguru hano mu Rwanda bwemeje ko amakipe ya Pepeniere, Gicumbi, Miroplast na Sorwathe azahurira mu mikino ya kamarampaka hagamijwe gushaka ugomba gusimbura ikipe y’Intare FC yatangaje ko itakiginnye ikiciro cya mbere.
Biteganyijwe ko mu minsi iri imbere FERWAFA izatangaza uko gahunda y’imikino iteye.
Muri Myakanga uyu mwaka, ikipe ya Intare FC na AS Muhanga zari zatsindiye gukina shampiyona y’ikiciro cya mbere, nyuma y’uko Intare yari yatsinze ku mukino wa nyuma AS Muhanga ibitego 2-1.
Nyuma ku wa 30 Kanama, ikipe y’Intare yatangaje ko itagikinnye shampiyona y’ikiciro cya mbere.
FERWAFA yafashe ikemezo cyo gutoranya amakipe 4 igendeye ku ngingo ya 10 y’amategeko agenga amarushanwa ivuga ko mu gihe bibaye ngombwa ko amakipe yo mu kiciro cya mbere agabanyuka, ubuyobozi bukuru bwa FERAWAFA bugomba gutegura imikino ya kamarampaka igomba guhuza amakipe 2 yari yaramanutse ndetse n’abiri yasezererewe muri 1/2 cy’irangiza cya shampiyona y’ikiciro cya kabiri.
Hagendewe kuri iyi ngingo rero, ikipe y’Intare yafashwe nk’iyari isanzwe mu kiciro cya mbere, mu gihe Sorwathe na Pepeniere zafashwe nk’izari zisanzwe mu kiciro cya kabiri.
