Scandinavia WFC yatsinze AS Kigali iyitwara igikombe cya shampiyona nyuma y’imyaka 10
Ikipe ya Scandinavia Women Football Club yo mu karere ka Rubavu, yabaye ikipe ya mbere ishoboye gukuraho agahigo k’imyaka 10 AS Kigali yari imaze yiharira ibikombe bya shampiyona, nyuma yo kuyitsinda igitego 1-0 ku munsi wa nyuma wa shampiyona.
Ni mu mukino usoza shampiyona y’abari n’abategarugori wabereye kuri Stade Umuganda mu karere ka Rubavu. Ni umukino Scandinavia yasabwaga byibura kunganya ikitwarira igikombe cya shampiyona ku ncuro ya mbere.
Igitego cyabonetse ku munota wa 23 w’umukino gitsinzwe na Ukwinkunda Jeanette ni cyo cyafashije Scandinavia y’umutoza Bizumuremyi Rajab uzwi ku kazina ka Mbegeti kwigaranzura AS Kigali yari imaze imyaka n’imyaniko yarabuze uwayihangamura.
Muri rusange Scandinavia yatwaye igikombe ifite amanota 54, irusha AS Kigali ya kabiri amanota atandatu.
Iyi kipe kandi yegukanye igikombe cya shgampiyona nta mukino n’umwe itsinzwe. Uretse kuba iyi kipe yegukanye igikombe, yanahawe akayabo ka 3,000,000Rwf, mu gihe AS Kigali yegukanye akayabo ka 1,5,000,000Rwf.
