REG VC yigaranzuye Gisagara yegukana igikombe cya shampiyona

Ikipe ya REG Volleyball yaraye yegukanye igikombe cya shampiyona bwa mbere mu mateka yayo, nyuma yo gutsinda Gisagara Volleyball Club mu mukino wa kamarampaka wabereye kuri Petit Stade i Remera.

Ikipe ya REG yegukanye iki gikombe nyuma yo gutsinda Gisagara amaseti atatu ku busa, mu mukino wa gatatu wa playoffs. Ni nyuma y’uko imikino ibiri yaherukaga guhuza aya makipe yombi yarangiye buri kipe ishoboye gutsinda indi amaseti atatu ku busa.

REG Volleyball Club y’umutoza Bennon Mugisha, yatwaye iseti ya mbere ku manota 25 kuri 23 ya Gisagara. Iseti ya kabiri na yo yayitwaye ku manota 25 kuri 21 ya Gisagara, mbere yo kwegukana n’iya gatatu ku manota 25 kuri 18 ya Gisagara VC.

Mukunzi Christophe waraye atowe nka MVP wa shampiyona y’u Rwanda ni we wafashije cyane REG kugera ku ndoto zayo zo gutwara igikombe cya shampiyona ku ncuro ya mbere.

Ni nyuma y’uko ibikombe bya shampiyona bibiri biheruka byagiye bitwarwa n’ikipe ya Gisagara.

Uretse kuba REG VC yegukanye igikombe, yanahembwe nk’ikipe nziza y’umwaka muri rusange.

Bennon Mugisha utoza iyi kipe, asanga kuba begukanye igikombe cya shampiyona ari intangiriro y’ibihe bishya REG yifuza kujyamo.

Gutwara igikombe cya shampiyona bisobanuye ko REG yahise ibona itike yo kuzahagararira u Rwanda mu mikino nyafurika iteganyijwe kuba mu mwaka utaha.

Abakinnyi bagize ikipe y’umwaka.

Emile Karera (Gisagara), Ivan Mahoro (UTB), Amadou Doudou Djibril (Gisagara), Olivier Ntagengwa (REG), Samuel Niyogisubizo (UTB) na Mukunzi Christophe wa REG.