Rayon Sports yitegura kwakira Enyimba FC yasubukuye imyitozo
Ku gicamunsi cy’uyu wa kane, Abakinnyi bake b’ikipe ya Rayon Sports basubukuye imyitozo nyuma y’umunsi 8 bari mu kiruhuko bitegura umukino wa ubanza wa 1/4 cya CAF Confederations Cup bazahuriramo na Enyimba FC yo mu gihugu cya Nigeria.
Ni imyitozo yitabiriwe n’abakinnyi 10 bonyine dore ko abenshi mu bakinnyi b’iyi kipe bari kumwe n’ikipe y’igihugu Amavubi ikomeje kwitegura Cote d’Ivoire, mu gihe abandi bakinnyi bafite utubazo tugiye dutandukanye.
Abakinnyi bitabiriye iyi myitozo barimo Kassim Ndayisenga, Mugabo Gabriel, Irambona Eric, Nova Bayama, Innocent Twagirayezu, Mugisha Francois Master, Crist Mbondi, Mugisha Gilbert, Saddam Nyandwi, Prosper Kuka Doncur ukomoka muri Ghana cyo kimwe na McCarthy Uguchukwu ukomoka muri Nigeria.
Abakinnyi batari kumwe n’ikipe y’igihugu batitabiriye iyi myitozo, barimo Bimenyimana Bonfils Caleb, Bashunga Abouba, Manishimwe Djabel, Mutsinzi Ange, Niyonzima Olivier Sefu, na Mugume Yassin.
Ni imyitozo yakoreshejwe n’umutoza wungirije Gatera Moussa kuko umutoza mukuru w’iyi kipe akiri iwabo muri Brazil.
Rayon Sports izakira Enyimba FC mu mukino ubanza wa 1/4 cy’irangiza cya CAF Confederations Cup uteganyijwe kuba ku wa 16 Nzeri.
