Pierrot na Tchabalala bafashije Rayon Sports gusezerera Etincelles mu gikombe cy’amahoro

Ikipe ya Rayon Sports ikatishije tike ya 1/4 cy’igikombe cy’Amahoro, nyuma yo gutsinda Etincelles mu mukino w’ikirarane ikayisezerera ku giteranyo cy’ibitego 3-1.

Ibitego 2 byo mu gice cya mbere by’abasore bakomoka i Burundi ni byo bifashjije iyi kipe y’umutoza Ivan Minnaert gusezerera iyi kipe y’i Rubavu yaherukaga kuyitendekaho banganya 1-1 mu mukino wa shampiyona.

Kwizera Pierrot niwe wafunguye amazamu ku munota wa 22 w’umukino, ku mupira yatereye inyuma gato y’urubuga rw’amahina, umuzamu Rukundo Protogene akisanga umupira winjiye mu izamu rye.

Rayon Sports yatsinze igitego cya kabiri ku munota wa 43 ibifashijwemo na kizigenza Shabani Hussein Tchabalala, wazamukanye umupira agacenga umuzamu wa Etincelles wasigaye aryamye mu mazi yari kuri Stade ya Kigali, bikarangira ateye umupira mu izamu ryambaye ubusa.

Ibi bitego ni byo byarangije igice cya mbere cy’umukino.

Nta byinshi bikomeye byigeze biba mu gice cya kabiri cy’umukino, kereka ku munota wa 69 w’umukino ubwo Mumbele Saiba yarekuraga ishoti rikomeye, umupira ugakurwamo na Ndayishimiye Eric Bakame.

Ku munota wa 70 nanone Etincelles yahushije ikindi gitego, nyuma y’umupira abakinnyi ba Etincelles batereye mu kavuyo kari mu izamu, bikarangira umupira ugaruriwe ku murongo w’izamu na Faustin Usengimana.

Ibi bitego 2-0 Rayon Sports yatsinze, byiyongereye kuri 1 Tchabalala yatsindiye i Rubavu mu mukino ubanza, Rayon Sports ikomeza muri 1/4 ku giteranyo cy’ibitego 3-1.

Iyi Rayon Sports igomba gucakirana na FC Marines na yo y’i Rubavu, mu mikino ya 1/4 cy’irangiza igomba gukinwa hagati y’itariki ya 12 na 13 Kamena hakinwa imikino ibanza.