Myugariro wakiniraga Rayon Sports yamaze kwerekeza mu gihugu cya Kenya
Myugariro Mugabo Gabriel wakiniraga ikipe ya Rayon Sports, yamaze gusinya muri KCB ibarizwa muri shampiyona y’ikiciro cya mbere ya Kenya.
Uyu musore wageze muri Rayon Sports avuye muri Police FC, yamaze gusinyira iyi kipe ya Banki y’Ubucuruzi ya KCB amasezerano y’imyaka ibiri.
Myugariro Mugabo Gabriel wari ushigaje igihe kitageze ku kwezi ngo asoze amasezerano yari afitanye na Rayon Sports, yasinyiye KCB nyuma y’igihe kirekire impande zombi zari zimaze mu biganiro.
Byitezwe ko uyu musore kuri ubu uri i Nairobi agaruka mu Rwanda ku wa gatanu w’iki cyumweru, kugira ngo abashe kwimura ibikoresho bye.
Amakuru avuga ko uyu mukinnyi yashimwe n’umutoza wa KCB mu mikino ibiri ya CAF Confederations Cup yakinnye ubwo Rayon Sports yahuraga na Gor Mahia yo muri Kenya, ndetse n’uwa CECAFA Kagame Cup Gor Mahia na Rayon Sports bahuriyemo mu gihugu cya Tanzania.
Mugabo Gabriel abaye umukinnyi wa kane KCB isinyishije mbere y’uko shampiyona ya Kenya itangira, nyuma ya Baraka Badi, Michael Kibwage na Bernard Mang’oli, bavanye mu makipe ya AFC Leopards na Sofapaka FC.
[team_standings 32825]
