Man City yanigiye Man U imbere y’abakunzi bayo iyifasha gusubira inyuma ku rutonde

Ikipe ya Manchester City yasanze Man United ku kibuga cyayo,Old Trafford, iyinyagira ibitego 3-0 iyirusha cyane.

Manchester United ifite imvune nyinshi ndetse ikaba itari hejuru mu mikinire,yatsinzwe mu mukino wabanjirijwe no guha icyubahiro umunyabigwi Sir Bobby Charlton watabarutse muri iki cyumweru.

Haaland yatsindiye City igitego cya mbere kuri penaliti ku munota wa 26 nyuma y’aho Rasmus Hojlund yatiye hasi Rodri mu rubuga rw’amahina.

Umunyezamu Onana yabujije Haaland gutsinda igitego cyabazwe ubwo yakuragamo umupira w’umutwe w’uyu rutahizamu wari uhagaze wenyine ku izamu.

Ku munota wa 49, Haaland yashyizemo igitego cya kabiri cy’umutwe ku mupira mwiza yahawe na Bernardo Silva,umusanga ahagaze wenyine aratsinda.

United yarushwaga yaje gutsindwa igitego cya gatatu ku munota wa 80 na Phil Foden ku mupira mwiza cyane yahawe na Haaland.

Ibitego byose bya City byinjiye ku makosa y’ubwugarizi bwa United bwarimo Evans na Maguire.

United yahushije uburyo bubiri bwabazwe birimo ubwa McTominay wateye ishoti rikomeye asigaranye n’umunyezamu Ederson wawushyize muri koloneri n’aho Marcus Rashford yasigaranye n’izamu ananirwa gutsinda.

Mu mikino 10 ya shampiyona, Man Utd imaze gutsindamo 5 itsindwa 5, nta bintu byo kunganya. Byaherukaga mu 1986/87

Uko urutonde rw’agateganyo rwa shampiyona ruhagaze:

1. Tottenham 26 pts
2. Arsenal 24
3. Man City 24
4. Liverpool 23
…
8. Man Utd 15
11. Chelsea 12

Imikino ikurikira:

04/11/2023
Fulham v Manchester United
Manchester City v Bournemouth
Newcastle v Arsenal

05/11/2023

Lutton v Liverpool

06/11/2023

Tottenham v Chelsea