Intambara:Guverinoma ya Israel yagiranye amasezerano na Hamas

Guverinoma ya Israel yashize yemeza amasezerano na Hamas yo kurekura abashimuswe, nyuma y’ibyumweru birenga bitandatu by’imirwano ikaze muri Gaza.

Itangazo ry’ibiro bya minisitiri w’intebe wa Israel rivuga ko abashimuswe 50 bazarekurwa mu gihe cy’iminsi ine.

Ryongeraho ko muri icyo gihe imirwano izaba ihagaze.

Bijyanye n’ayo masezerano, iryo tangazo rivuga ko “irekurwa rya buri bantu 10 b’inyongera bashimuswe rizatuma habaho umunsi umwe w’inyongera mu ihagarikwa ry’imirwano”.

Abo bakwiyongera ku bashimuswe 50 bazarekurwa bwa mbere bijyanye n’ayo masezerano.

Mu itangazo, Hamas ivuga ko abashimuswe 50 bazarekurwa nk’ingurane ku irekurwa ry’Abanya-Palestine b’abagore n’abana bose hamwe 150 bafungiye mu magereza yo muri Israel.

Umunyamakuru wa BBC dukesha iyi nkuru utara inkuru kuri minisiteri y’ububanyi n’amahanga y’Amerika, avuga ko Amerika yagize uruhare rukomeye muri aya masezerano.

Uwo munyamakuru avuga ko kuva kuri Minisitiri w’ububanyi n’amahanga w’Amerika Antony Blinken, umukuru w’urwego rw’ubutasi bwo hanze bw’Amerika (CIA) na Perezida Joe Biden ubwe, bose bavuganye cyane n’abategetsi ba Qatar – ahaba abategetsi ba politiki ba Hamas – na Israel kugira ngo ayo masezerano agerweho.

Minisitiri w’intebe wa Israel Benjamin Netanyahu yashimiye Perezida Biden ku kuvugurura ingingo z’ayo masezerano, kugira ngo abemo “abashimuswe benshi [barekurwa] n’ibiguzi biri hasi”.

Biden yavuze ko “ashimishijwe bidasanzwe” no kuba bamwe mu bashimuswe, “bamaze ibyumweru bafunzwe ndetse bari mu kaga ntagereranywa”, bazarekurwa.

‘Ni ingenzi ko ingingo zose zishyirwa mu bikorwa’ – Biden
Mu itangazo, Biden yashimiye abategetsi ba Qatar na Misiri ku bw'”ubuyobozi bw’ingenzi cyane n’ubufatanye” bwabo mu kugera kuri aya masezerano.

Yanavuze ko ashima “umuhate” wa Minisitiri w’intebe wa Israel Netanyahu mu gushyigikira ko imirwano iba ihagaze.

Yagize ati: “Ni ingenzi ko ingingo zose z’aya masezerano zishyirwa mu bikorwa mu buryo bwuzuye.”

Yashimye Netanyahu ku gutuma indi mfashanyo y’ubutabazi igera muri Gaza, bijyanye n’ayo masezerano.

Biden yavuze ko ibi “bizoroshya umubabaro w’imiryango y’Abanya-Palestine b’inzirakarengane yo muri Gaza”.