Imvururu Rayon Sports yateje muri Algeria zayiviriyemo gucibwa akandi kayabo na CAF
Ishyirahamwe ry’umupira w’amaguru muri Afurika CAF ryongeye gufatira ibihano ikipe ya Rayon Sports, nyuma y’uko bamwe mu bakinnyi b’iyi kipe bagize uruhare mu guteza imvururu zakurikiye umukino wa CAF Confederations Cup iyi kipe yanganyijemo na USM Alger 1-1.
Rayon Sports na USM Alger bakinnye ku wa 29 Nyakanga, mu mukino wo kwishyura mu matsinda ya CAF Confederations Cup wabereye i Blida muri Algeria ugakurikirwa n’ubushyamirane hagati y’abakinnyi b’impande zombi.
Ubu bushyamirane CAF ivuga ko bwatejwe na Rayon Sports bwayiviriyemo gucibwa amande angana n’ibihumbi 20 by’amadorali ya Amerika, binaviramo Yannick Mukunzi, Christ Mbondi na Kassim Ndayisenga guhagarikwa mu mikino imwe n’imwe Nyafurika.
Itangazo iri shyirahamwe ryasohoye nyuma y’inama y’abagize akanama nkemurampaka karyo yabaye ku wa 05 Kanama, rivuga ko izi mvururu zatangijwe na Yannick Mukunzi wari wambaye numero 6 mu mugongo, bikarangira Christ Mbondi wari wambaye numero 9 ndetse na Kassim Ndayisenga wari wambaye 29 na bo bazinjiyemo.
CAF igira iti” Nyuma yo kwigana ubushishozi ibyabaye, kureba neza amashusho no kwigana ubushishozi amategeko, twanzuye ko Rayon Sports itanga amande y’ibihumbi 10 by’amadorali ya Amerika kubera uruhare rwa Yannick Mukunzi mu mvururu, amande y’ibihumbi 5 by’amadorali ya Amerika kubera uruhare rwa Christ Mbndi wari wambaye numero 9, ndetse n’amande y’ibihumbi 5 by’amadorali kubera uruhare Ndayisenga Kassim wari wambaye numero 29 yagize muri izi mvururu.”
Hejuru y’ibi, Yannick Mukunzi yahagaritswe imikino itatu harimo uwa Yanga n’uwa Gor Mahia ndetse n’undi mukino mu gihe Rayon Sports yaba igeze muri 1/4 cy’irangiza, mu gihe Christ Mbondi na Kassim Ndayisenga bahagaritswe imikino 2: Uwa Young Africans n’uwa Gor Mahia.
Aya mande yiyongereye ku bihumbi 2 by’amadorali iyi kipe yari iherutse gucibwa nyuma yo kutubahiriza amategeko agenga imyambarire ku makipe ari mu mikino y’amatsinda mu mikino nyafurika.
