FC Barcelona yaguze umunya Brazil ufatwa nk’umusimbura wa Neymar-Amafoto
Ikipe ya FC Barcelona yamaze gusinyisha inerekana ku mugaragaro umunya Brazil Arthur Mero yaguze muri Gremio yo muri Brazil, uyu akaba afatwa nk’umusimbura wa Neymar Jr wamaze kuva muri iyi kipe umwaka ushize yerekeza muri PSG yo mu Bufaransa.
Iyi kipe y’i Catalunya yarangizanyije na Gremio kuri uyu musore ku wa mbere w’iki cyumweru, mbere y’uko ahaguruka iwabo yerekeza i Barcelona yageze ejo ku wa gatatu.
Arthur Mero w’imyaka 21 y’amavuko Barcelona yamuguze miliyoni 27.5 z’ama pounds.
Akigera i Barcelona ejo ku wa gatatu, yabanje kwerekanirwa ku biro by’iyi kipe, nyuma atemberezwa ibice bigize Stade ya Camp Nou isanzwe ikinirwaho na Barcelona aho yanifotoreje.
Magingo aya harimbanyije igikorwa cyo kwerekana uyu musore ku mugaragaro.
Nyuma yo kugera i Catalunya, Arthur yavuze ko yishimiye kuba umukinnyi wa FC Barcelona, bijyanye n’uko yari yararose kera kuzakinira iyi kipe.
” Ndanezerewe cyane. Izi ni inzozi nagize kuva nkiri muto. Buri gihe narotaga nambaye umwambaro wa FC Barcelona. Uyu munsi ni umunsi udasanzwe kuri njye. Iyi ni ikipe y’igihangage, itwara ibikombe kandi nanjye ni yo ntego yanjye, gutwara ibikombe byinshi bishoboka kuko iki kirango cy’ikipe nambaye kibikwiye.” Arthur aganira na Televiziyo ya Barca.
FC Barcelona yatangaje ko yamaze gusinyisha uyu mukinnyi mu mpera z’iki cyumweru ibicishije ku rubuga rwayo. Uyu mukinnyi yamuhaye amasezerano y’imyaka 6, ikipe imwifuje aya masezerano atararangira ikaba igomba kumwishyuraho angana na miliyoni 350 z’ama Pounds.
Arthur wakiniye ikipe y’igihugu ya Brazil y’abato, asanze muri Barcelona mwene wabo Philippe Coutinho. Byitezwe y’uko uyu mukinnyi azakinira Brazil nkuru mu minsi mike iri imbere.
Arthur yatangiriye gukina umupira muri Goias, mbere y’uko ajyanwa na Luiz Felipe Scolari muri Gremio. Iyi kipe ya Gremio yatwaranye na yo ibikombe 2 bikomeye, harimo igikombe cy’igihugu cya Brazil ndetse na Coppa Libertadores(Champions league yo muri Amerika y’Epfo.)
