Champions League: Tottenham yigaranzuye Olympiacos, Real Madrid inganya na PSG, Lewandowski akora amateka

Imikino y’ijonjora rya Champions League  ryakomeje mu ijoro ryo kuri uyu wa Kabiri Tottenham Hotspur yigaranzura Olympiacos mu gihe Real Madrid yananiwe gutsindira Paris Saint Germain i Santiago Bernabéu muri Espagne.

Umukino wahuje Real Madrid na PSG: Ni umukino wo mu itsinda A ririmo Paris Saint-Germain, Real Madrid, Club Brugge na Galatasaray, Real Madrid ni yo yabanje gutsinda ibitego bibiri byose bitsinzwe na Karim Benzema ku munota wa 17 na 79 mu gihe PSG yishyuriwe na Kylian Mbappe ku munota wa 81 na Pablo Sarabia umukino ukarangira ari 2-2.

Muri iri tsinda kandi Galatasaray na Brugge banganyije 1-1. Bivuze ko PSG ari yo iyoboye itsinda n’amanota 13, Real Madrid ni iya kabiri n’amanota 8, Club Brigge ni iya gatatu n’amanota 3 mu gihe galatasary ari iya nyuma n’amanota 2.

Mu Bwongereza by’umwihariko k’umutoza Jose Mourinho n’ikipe ye Tottenham Hotspurs na ho bari bakiriye Olympiacos mu mukino warangiye Jose Mourinho atsinze umukino we wa kabiri kuva yafata iyi kipe ibitego 4-2 n’ubwo Olympiacos ari yo yabibanje. Olympiacos yatsindiwe na Youssef El Arabi ku munota wa 6 na Ruben Semedo ku munota wa 19, mu gihe Tottenham yatsindiwe na Harry Kane watsinze ibitego 2, Dele Alli
na serge Aurier.

Muri iri tsinda kandi FC Bayern München yanyagiye FK Crvena Zvezda ibitego 0-6.

Robert Lewandowski yandikishije amateka kuri uyu mukino muri Champions League atsindira Bayern ibitego 4 aba umukinnyi umaze gutsindira iyi kipe yo mu budage ibitego byinshi muri iri rushanwa.

Muri iri tsinda B FC Bayern München irayoboye n’amanota 15, Tottenham n’amanota 10, FK Crvena Zvezda n’amanota atatu mu gihe iya nyuma ari Olympiacos n’inota rimwe.

Mu itsinda C, Manchester City na Shakhtar Donetsk banganyije 0-0, Atalanta itsinda Dinamo Zagreb 2-0. Manchester City ni iya mbere n’amanota 11, Shakhtar Donetsk iya kabiri n’amanota 6, Dinamo Zagreb iya gatatu n’amanota 5 mu gihe Atalanta ari iya nyuma n’amanota 4.

Mu itsinda D, Juventus yatsinze Atletico Madrid 1-0, Bayer Leverkusen itsinda Lokomotiv Moscow 0-2. Juventus ni iya mbere n’amanota 13, Atletical Madrid ni iya kabiri n’amanota 7, Bayer Leverkusen ni iya 3 n’amanota 6 mu gihe Lokomotiv Moscow ari iya nyuma n’amanota 3.

Muri buri tsinda hazazamukamo amakipe abiri ya mbere. Indi mikino ikaba irakomeza kuri uyu wa Gatatu.