Brazil yatsinze Peru yegukana Copa America nyuma y’imyaka 12 itayitwara
Ikipe y’igihugu ya Brazil Selecao, yegukanye irushanwa rya Copa America ryari rimaze ibyumweru bitatu ribera ku butaka bwayo, nyuma yo gutsinda Peru ibitego bitatu ku busa ku mukino wa nyuma wakinwe mu ijoro ryakeye.
Muri uyu mukino, rutahizamu Gabriel Jesus ukinira Manchester City yatsinze igitego kimwe anatanga umupira wavuyemo igitego, mbere yo gusohorwa mu kibuga kubera ikarita itukura yaje ikurikira ikarita ya kabiri y’umuhondo.
Brazil yafunguye amazamu ku munota wa 15 w’umukino ibifashijwemo na Everton Sousa Soarez, ku mupira yari ahawe na Gabriel Jesus.
Iki gitego cyaje kwishyurwa kuri Penaliti na Paolo Guerrero, mbere y’umunota umwe ngo Gabriel Jesus atsindire Brazil igitego cya kabiri ku munota wa 45 w’umukino.
Ikipe y’igihugu ya Brazil yakinnye iminota myinshi y’igice cya kabiri cy’umukino ifite abakinnyi 10 mu kibuga, nyuma y’uko Gabriel Jesus yeretswe ikarita ya kabiri y’umuhondo nyuma yo gusimbukira mu mugongo wa Carlos Zambrano. Umusifuzi Roberto Tobar ntiyashidikanyije kumwereka ikarita ya kabiri y’umuhondo, birangira Jesus asohotse mu kibuga n’amarira menshi.
Brazil yashimangiye insinzi yayo ku munota wa 90 w’umukino ibifashijwemo na Richarlison kuri penaliti, nyuma y’ikosa ryari rimaze gukorerwa kuri Everton mu rubuga rw’amahina.
Ibitego bitatu kuri kimwe byari bihagije kugira ngo iki gihugu cyegukane Copa America ya cyenda mu mateka yayo, nyuma y’imyaka 12 itegukana iri rushanwa. Brazil yaherukaga gutwara Copa America muri 2007 itsinze Argentine ku mukino wa nyuma.
