APR FC na Singida United zahawe amahirwe yo kwitabira CECAFA

Amakipe ya APR FC na Singida United yo mu gihugu cya Tanzania yahawe amahirwe yo gukina CEFAFA Kagame Cup y’uyu mwaka iteganyijwe kubera mu gihugu cya Tanzania guhera mu mpera z’uku kwezi.

Aya makipe yinjije muri iri rushanwa mu rwego rwo gusimbura amakipe ya Yanga Africans na St George yo muri Ethiopia yatangaje ko atazitabira iri rushanwa.

Ikipe ya APR FC ni yo igomba gusimbura Young Africans, bityo ikaba yahise ishyirwa mu tsinda rya gatatu iyi kipe yari iherereyemo aho iri kumwe na Simba Sports Club, Singida United yasimbuye St George na yo yabarizwaga muri iri tsinda, ndetse n’ikipe ya Dakadaha yo muri Somalia.

Indi kipe yinjijwe muri iri rushanwa ni ikipe ya Vipers yo muri Uganda. Iyi na yo yaje isimbura ikipe ya KCCA yo muri Uganda yatangaje ko itazitabira kubera imyiteguro y’imikino nyafurika irimo.

Iri rushanwa riteganyijwe kubera i Dar Es Salaam kuva ku wa 28 Kamena kugeza ku wa 14 Nyakanga.

Andi matsinda:

Itsinda A: Azam (Tanzania), JKU (Zanzibar), Kator (South Sudan), Vipers FC (Uganda)

Itsinda B: Rayon Sports (Rwanda), Gor Mahia (Kenya) Lydia Ludic (Burundi), Ports (Djibouti).