Amafoto-Messi na Coutinho bafashije Barcelona kubona amanota 3 ya mbere muri shampiyona
Ikipe ya FC Barcelona yaraye ibonye amanota 3 ya mbere muri shampiyona ya Espagne 2018/2019,nyuma yo gutsinda Deportivo Alaves ibitego 3-0, mu mukino w’umunsi wa mbere wa shampiyona wabereye ku kibuga Camp Nou.
Ni umukino watangiye Barcelona yiharira umupira ari na ko igerageza uburyo bw’ibitego, gusa iminota 45 y’igice cya mbere irangira amakipe yombi anganya 0-0.
FC Barcelona yabonye uburyo bw’ibitego butandukanye muri iki gice cya mbere, harimo ubwo Messi yabonye mu minota ya mbere y’umukino aho yateye umupira n’akaguru k’indyo ujya hanze, Coup Franc ye yagonze umutambiko w’izamu ndetse n’uburyo bugera kuri butatu Ousmane Dembele yananiwe kubyaza umusaruro.
Mu gice cya kabiri Ernesto Varvelde yakoze impinduka, avana mu kibuga Nelson Semedo yinjiza Philippe Coutinho, Arthur Mero asimbura Ousmane Dembele, mu gihe Artulo Vidal yinjiye asimbura Sergio Busquets.
Ibi byahaye imbaraga nyinshi ikipe ya Barca, bituma yotsa igitutu cyane Alaves yakinaga yugarira ari na ko icungira kuri Contre-Attaques.
Barcelona yabonye igitego cya mbere ku munota wa 64, ibifashijwemo na kapiteni Lionel Messi. Ni kuri Coup Franc yari ateye bikarangira umuzamu Fernando Pacheco atabashije kugarura umupira.
FC Barcelona yabonye igitego cya kabiri ku munota wa 83 ibifashijwemo na Philippe Coutinho. Ni ku mupira yari ahawe na mwene wabo Arthur Melo.
Lionel Messi wahaye akazi gakomeye abasore ba Alaves yarangije akazi mu minota 2 y’inyongera atsinda igitego cya 3, ku mupira yari ahawe na Luis Suarez.
