Abasore bane ba Team Rwanda bamaze kwikura muri Tour de France y’abato
Abasore bane muri 6 bari bahagarariye u Rwanda mu isigwa ry’amagare ry’abari munsi 23 rizenguruka igihugu cy’Ubufaransa, bamaze kwikura mu isiganwa nyuma yo kugwa incuro nyinshi.
Aba basore bavuye mu isiganwa mu gihe uyu munsi ari bwo basiganwaga agace ka gatatu k’iri siganwa rizwi nka Tour de l’Avenir.
Abasore b’u Rwanda bamaze kuva muri iri siganwa harimo Didier Munyaneza bita Mbappe, Eric Manizabayo, Samuel Hakiruwizeye na Ukiniwabo Rene Jean Paul.
Ibi bisobanuye ko agace ka gatanu k’iri siganwa kazakinwa ku munsi w’ejo u Rwanda ruzaba rugafitemo abakinnyi babiri bonyine, aba bakaba ari Samuel Mugisha na we waguye ku munsi w’ejo bikaba ngombwa ko agera ku murongo yatakayeho iminota 20 yose, cyo kimwe na Areruya Joseph Kimasa.
Nyuma y’uduce tune tumaze kwirukankwa, Umufaransa Alan Riou ni we uyoboye abandi ku rutonde rusange, akaba arusha isegonda rimwe Magnus Bak Klaris ukomoka muri Denemark umukurikiye.
