Uwahoze ari myugariro wa Kiyovu na Rayon Sports biravugwa ko yishwe na COVID-19
Mbonabucya Yves umurundi wahoze ari myugariro w’amakipe azwi mu Rwanda, Rayon Sports na Kiyovu Sport atabarutse azize Covid19 nyuma yo kwandura Coronavirus.
Mbonabucya Yves yatabarutse afite imyaka 37 y’amavuko
Ku gicamunsi cyo kuri iki Cyumweru tariki ya 12 Mata nibwo Mbonabucya Yves yaguye mu bitaro nyuma y’iminsi arwariye iwabo mu Burundi.
Mbonabucya myugariro, yazamukiye mu ikipe y’abato ya Kiyovu Sport mu mwaka wa 1997-1998, ubwo yatozwaga na Sogonya Hamiss (Cyishi).
Kiyovu Sport yayimazemo imyaka ibiri, Rayon Sports FC ihita imugura mu mwaka wa 1999 ubwo iyi kipe yatozwaga na Raul Shungu, naho ahakina umwaka umwe gusa, aza kugira ikibazo k’imvune bimuviraho guhagarika ruhago akiri muto.
Mbonabucya Yves apfuye afite imyaka 37 y’amavuko, bivugwa ko azize Covid-19, ariko Minisiteri y’Ubuzima mu Burundi ntacyo iratangaza ku rupfu rwe.
Uyu abaye umuntu uzwi mu gihugu cy’Uburundi uhitanywe na Covid19 nyuma y’umuhanzi wakunzwe cyane muri aka karere k’ibiyaga bigari Willy Léonard Niyomwungere wahitanwe n’iki cyorezo muri Malawi.
