Undi mukinnyi ukomeye ku Isi yitabye Imana azize impanuka
Haravugwa inkuru y’incamugongo mu mupira w’amaguru nyuma y’aho Marios Oikonomou, wahoze ari myugariro w’Ikipe y’Igihugu y’u Bugereki, yitabye Imana afite imyaka 33 y’amavuko, nyuma y’iminsi icyenda ari mu bitaro azize ibikomere bikomeye yatewe n’impanuka ya moto.
Oikonomou yakoze impanuka ku wa 23 Gicurasi 2026 mu mujyi wa Ioannina, aho yavukiye mu gihugu cy’u Bugereki. Nyuma yo kugongana n’imodoka, yagize ibikomere bikomeye mu mutwe bituma ajyanwa kwa muganga igitaraganya, anakorerwa ubuvuzi bwihuse burimo kubagwa ubwonko kugira ngo abaganga bagerageze kurokora ubuzima bwe.
Nubwo yakomeje kwitabwaho mu cyumba cy’indembe, ubuzima bwe bwaje kurangira ku wa 1 Kamena 2026.
Marios Oikonomou yari umwe mu bakinnyi bazwi cyane mu Bugereki. Yatangiye umwuga we muri PAS Giannina mbere yo gukinira amakipe atandukanye akomeye i Burayi arimo Bologna, Cagliari, Sampdoria, AEK Athens ndetse na FC Copenhagen yo muri Denmark.
Mu mwaka wa 2024 ni bwo yahagaritse gukina umupira w’amaguru nk’uwabigize umwuga.
Mu Ikipe y’Igihugu y’u Bugereki yakiniye imikino itandatu, aho yagaragaje ubuhanga bwe nk’umwe mu ba myugariro b’inyuma bizerwaga cyane. Mu rugendo rwe rw’umupira kandi yegukanye igikombe cya shampiyona ya Denmark ari kumwe na FC Copenhagen.
Nyuma y’urupfu rwe, amakipe yakiniye, Ishyirahamwe ry’Umupira w’Amaguru mu Bugereki ndetse n’abakunzi b’umupira hirya no hino ku isi bagaragaje agahinda batewe n’itabaruka rye. Ubutumwa bwinshi bwo kumuha icyubahiro bwakomeje gukwirakwira ku mbuga nkoranyambaga, benshi bamwibuka nk’umukinnyi waranzwe n’ikinyabupfura, umurava n’ubwitange mu kazi ke.
Urupfu rwa Oikonomou rwongeye kwibutsa benshi ubukana bw’impanuka zo mu muhanda n’akamaro ko kubahiriza amategeko y’umutekano mu gutwara ibinyabiziga, cyane cyane kuri abatwara amapikipiki.
Marios Oikonomou (1992–2026) asize yibukirwa nk’umwe mu bakinnyi batanze umusanzu mu mupira w’amaguru w’u Bugereki ndetse no mu makipe atandukanye yakiniye ku mugabane w’u Burayi.
Urupfu rwa Marios Oikonomou rwongeye gusiga agahinda gakomeye mu muryango mugari w’umupira w’amaguru ku Isi. Ni inkuru ije ikurikira indi yababaje benshi mu mwaka ushize, ubwo rutahizamu wa Liverpool n’Ikipe y’Igihugu ya Portugal, Diogo Jota na murumuna we André Silva bitabiraga Imana umunsi umwe bazize impanuka y’imodoka muri Espagne muri Nyakanga 2025.
Icyo gihe isi y’umupira yagaragaje amarangamutima menshi, amakipe n’abakinnyi batandukanye bahurira mu cyunamo. Uyu munsi, urupfu rwa Oikonomou rwibutsa ko nubwo abakinnyi baba ibyamamare ku kibuga, ubuzima bwabo bukomeza kuba nk’ubw’abandi bose kandi bushobora guhagarara mu buryo butunguranye.
Abakunzi b’umupira w’amaguru bazakomeza kwibuka Marios Oikonomou na Diogo Jota nk’abakinnyi bagize uruhare mu gutanga ibyishimo byinshi ku bibuga, ndetse amazina yabo azakomeza kubaho mu mateka y’amakipe n’ibihugu bakiniye.
