Umutoza wa Arsenal Mikel Arteta yasanzwemo coronavirus

Ku mugoroba wo kuwa kane tariki ya 12 Werurwe 2020, ubuyobozi bw’ikipe ya Arsenal bwatangaje ko ko umutoza wayo, Mikel Arteta, yanduye icyorezo cya Coronavirus ikomeje kwibasira abatari bake mu bice bitandukanye by’Isi.

Itangazo ryashyizwe ahagaragara n’iyi kipe yo mu Bwongereza, rivuga ko yabaye ifunze ikibuga cyayo cy’imyitozo ndetse n’abantu baheruka guhura na Mikel Arteta bakaba bashyirwa mu kato, barimo abafatanya n’uyu mutoza mukuru.

Mikel Arteta w’imyaka 37, wababajwe n’ibisubizo yahawe, yavuze ko nyuma yo kumva atameze neza, yisuzumishije bagasanga yaramaze kwandura Coronavirus.

Yakomeje avuga ko “azagaruka mu kazi bidatinze mu gihe azaba abyemerewe.”

Biteganyijwe ko Arsenal izahura na Brigthon mu mukino wa Shampiyona uzaba ku Cyumweru.

Umukinnyi ukomeye umaze kugaragarwaho na Coronavirus, ni myugariro wa Juventus, Daniele Rugani mu gihe bivugwa ko Paulo Dybala yaba yamaze gufatwa n’iki cyorezo.

Ikinyamakuru El Nacional cyo mu Butaliyani, cyatangaje ko kugeza ubu abantu 121 bo muri Juventus bishyize mu kato mu rwego rwo kwirinda ikwirakwiza ry’iki cyorezo.

Abakinnyi batatu ba Leicester City bashyizwe mu kato mu gihe Chelsea yasubitse imyitozo ejo hashize, ku wa Kane, kubera iki cyorezo.

Ibikorwa by’imikino mu Butaliyani byamaze guhagarikwa kugeza tariki ya 3 Mata mu gihe na Shampiyona ya Espagne, La Liga ndetse n’ibikorwa byose by’umupira w’amaguru mu Bufaransa nabyo byahagaritswe.

Imikino ibiri ya Europa League, uwari guhuza Seville na AS Roma n’uwari guhuza Inter Milan na Getafe, kuri uyu wa Kane, yombi yasubitswe kubera Coronavirus mu gihe indi yabereye mu muhezo.

Imikino ibiri ya 1/8 yo kwishyura yari kuzakinwa mu cyumweru gitaha muri UEFA Champions League, uwa Manchester City na Real Madrid n’uwari guhuza Juventus na Lyon, yombi yasubitswe kuko abakinnyi ba Juventus n’aba Real Madrid bashyizwe mu kato.

Impuzamashyirahamwe y’Umupira w’Amaguru i Burayi, UEFA, yatangaje ko ku wa Kabiri utaha, tariki ya 17 Werurwe 2020, hazaba inama yo kwiga uburyo amarushanwa yayo yakomeza kubamo cyangwa agahagarikwa. Ikazakorwa hifashishijwe amashusho (video conference).

Igikombe cy’u Burayi (EURO 2020) cyagombaga kuba mu mpeshyi, gishobora kwimurirwa mu mwaka utaha wa 2021.