Umunyarwandakazi yanditse amateka ifoto ye igaragara mu nzu ndangamurage ikomeye mu Buholandi
Uwase Sandra, Umunyarwandakazi w’umunyamideli ufite imyaka 21 y’amavuko wanatwaye ikamba rya Miss wahize abandi ku mbugankoranyambaga mu irushanwa rya Miss Africa Netherland yanditse amateka ku mugabane wa Afurika no ku Isi muri rusange maze ifoto ye igaragara mu nzu ndangamurange iri mu zikomeye mu gihugu cy’Ubuholandi.
Ifoto ya Sandra Uwase yamanitswe mu nzu ndangamurange ya Vermeer centrum Delft museum mu Buholandi , umunyarwandakazi usanzwe aba mu Buholandi yabaye umwirabura wa mbere ugize ifoto iyariyo yose mu nzu ndangamurage zitandukanye ziri muri iki gihugu , iyi foto ya Uwase Sandra yanditse amateka, yakozwe n’umunyabugeni ukomeye cyane witwa Jenny Boot ukora mu nzu y’ubugeni iri I Velp mu ntara ya Gelderland mu gihugu cy’Ubuhorandi.
Iyi foto ya Sandra , umunyabugeni yayishushanyije ashaka kwerekana ko umukobwa w’umwirabura ashoboye cyangwa se afite agaciro kuko insanganyamatsiko ye kuri iyi foto ari “Umukobwa w’umwirabura w’agaciro” [Black girl with the Pearl]. Iyi foto uyu munyabugeni yagiye ayikwirakwiza ku mbuga nkoranyambaga zitandukanye ari nako ayimanika ahantu hatandukanye maze iramenyekana cyane ndetse iranakundwa cyane mu gihugu cy’Ubuholandi.
Mu kiganiro yagiranye na Teradignews.rw , Uwase Sandra yadutangarije ko yashimishijwe no kuba abaye umwirabura wa mbere ugize ifoto muri iyi nzu ndangamurage ya Vermeer .
Yagize ati :” Uyu munyabugeni wakoze ifoto yanjye ntabwo yari asanzwe aziranye n’abashinzwe iyi nzu ndangamurage ahubwo ni uko yakunzwe cyane niyo mpamvu bayishyizemo, biranshimishije cyane kuko mbaye umwirabura wa mbere ugizemo ifoto , bampaye amafaranga kandi azangirira akamaro mu mwuga wanjye wo kwerekana imideli.”
Mu kiganiro twagiranye, Sandra Uwase yakomeje ashishikariza abirabura aho bari hose by’umwihariko abanyafurika ko bagomba gutinyuka bakajya bigirira icyizere cyane ko ari beza kandi bashoboye.
Iri rushanwa Sandra Uwase rya Miss Africa Netherland yatwayemo ikamba rya Miss Social Media ni irushanwa ribera mu gihugu cy’Ubuholandi rishigikira ndetse rifasha abakobwa b’Abanyafurika gutera imbere ryatangiye muri 2013. Uwase Sandra yagiye kuba mu gihugu cy’Ubuholandi afite imyaka 5, abana na nyina ndetse na murumuna we, kugeza ubu Uwase ni umunyeshuri muri Kaminuza ya Hogeschool Rotterdam mu ishami rya ‘Social Work’.
