Umunyarwanda ukinira Manchester United arifuzwa cyane n’indi kipe
Ikipe ya Ipswich Town ibarizwa muri shampiyona y’icyiciro cya gatatu mu Bwongereza, irifuza gusinyisha Umunyarwanda Noam Emeran usanzwe akinira Manchester United.
Iyi kipe iheruka kwemeza Kieran McKenna wahoze ari umutoza wungirije wa Manchester United nk’umutoza wayo mukuru, akaba ari na we wifuza gusinyisha Noam Emeran muri Mutarama 2022 ubwo isoko ryo kugura no kugurisha abakinnyi rizaba ryongeye gufungura imiryango.
Ikinyamakuru The Times Sport dukesha iyi nkuru kivuga ko uretse Noam, umutoza McKenna anifuza gusinyisha abandi bakinnyi babanye muri Manchester United y’abato, barimo Anthony Elanga, Tendon Mengi, Dylan Levitt na Shola Shoretire.
Noam Fritz Emeran w’imyaka 19 y’amavuko, asanzwe nka rutahizamu unyura ku ruhande. Ni umuhungu wa Nkusi Fritz Emeran wahoze ari myugariro w’iburyo w’ikipe y’Igihugu y’u Rwanda ’Amavubi’.
Muri 2019 ni bwo yashyize umukono ku masezerano yo gukinira ikipe ya Manchester United, gusa ntiyabona umwanya uhagije wo gukina kubera ibibazo by’imvune. Nko muri uyu mwaka w’imikino yakiniye Manchester United umukino umwe wonyine muri shampiyona y’abatarengeje imyaka 23.
Uwari umutoza wa Manchester United, Ole Gunnar Solskjaer, yamusinyishije mu myaka ibiri ishize amukuye mu kipe ya Amiens yo mu Bufaransa, igihugu umuryango we usanzwe utuyemo.
