Umukinnyi wa Manchester United azengetejwe n’abagore bari kwiyongera umusubirizo

Umukinnyi wa Manchester United,Antony, yarezwe gukubita abandi bagore babiri nyuma y’ikimuzengereje muri iyi minsi.

Ibi bibaye nyuma y’uko uyu mukinnyi waguzwe miliyoni 85 z’ama pound asohora itangazo ahakana yivuye inyuma ibirego byo guhohotera uwari umukunzi we Gabriella Cavallin.

Umunyeshuri wiga amategeko witwa Rayssa de Freitas n’umukozi wo muri Banki,Ingrid Lana,nabo bemeje ko uyu mukinnyi yabakubise nkuko byatangajwe n’ikinyamakuru cyo muri Brazil,Jornal Extra.

Raporo ya polisi yashyizwe hanze yo muri Gicurasi 2022 yatanzwe na Rayssa, yemeje ko uyu mukinnyi yamukubise ari kumwe n’icyamamare kuri interineti,Mallu Ohana.

Rayssa yavuze ko yamukubise yicaye inyuma mu modoka ya Antony ya Land Rover basohokanye mu mujyi wa São Paulo muri Brazil.

Yavuze ko Antony ariwe wari utwaye, ari kumwe n’umwogosha witwa Rafa Contes.

Bivugwa ko uyu mukobwa yabwiye abapolisi bo muri Brazil ko yashwanye na Mallu kubera ko atashakaga “gukomeza kwishimisha” hamwe nabo.

Rayssa yavuze ko impaka zahindutse urugomo maze agabwaho igitero na Mallu na Antony.

Yavuze ko yakinguye urugi rw’inyuma rw’imodoka arahunga nyuma y’uko Antony ahagaze ku cyapa.

Raporo y’abapolisi yavuze ko umumotari wari inyuma y’iyi Land Rover yemeje ko yiboneye urwo rugomo maze yandika plake y’imodoka ya Antony.

Rayssa akimara kuva mu modoka, uyu mumotari yavuze ko Antony yahunze ajya ahantu hatazwi.

Ikinyamakuru cyo muri Brazil kivuga ko uyu munyeshuri wiga amategeko yahise ajyanwa mu bitaro.

Ingrid Lana n’uwa gatatu bivugwa ko yahohotewe n’uyu mukinnyi wo muri Premier League.

Uyu mukozi wa banki w’imyaka 33 y’amavuko yashinje Antony ihohotera rishingiye ku mubiri mu kiganiro yahaye Record, giteganyijwe gutangazwa ku cyumweru cyose.

Ingrid yagize ati: “Yagerageje kuryamana nanjye, ariko mbyanze ansunika ku rukuta, maze ndukubitaho umutwe”.

Ingrid avuga ko ibi byabereye mu rugo rwa Antony i Manchester mu Kwakira umwaka ushize.

Mu kiganiro kitaragaragara, uyu mukobwa avuga ko atigeze agirana umubano na Antony ariko yasanze imyitwarire ye “idasanzwe”.

Ingrid ati: “Nari ndajwe ishinga n’ubucuruzi. Yarantumiye maze mpageze nsanga afite indi gahunda. Ntabwo nigeze mba indaya y’umuntu.”

Nyuma y’ibi birego biheruka, abahagarariye Antony basohoye irindi tangazo rivuga ko iki kirego nta shingiro gifite.