Umuherwe w’ikipe ya Leicester City ashobora kuba yapfiriye mu mpanuka y’indege

Indege ya Vichai Srivaddhanaprabha, umuherwe w’ikipe ya Leicester City yahindutse umuyonga, nyuma yo gukorera impanuka hanze ya stade y’iyi kipe nyuma y’umukino wa shampiyona Leicester City yari imaze gukinamo na West Ham United.

Iyi ndege yakoreye impanuka kuri Parking ya Stade ya King Power ubwo uyu muherwe yari ayirimo.

Ababonye iyi ndege ikora impanuka bavuze ko yahanutse nyuma y’akanya gato ihagurutse ku kibuga. Amakuru avuga ko iyi ndege iri mu bwoko bwa kajugujugu yakoze impanuka nyuma yo kugira ikibazo cya moteri.

Kugeza ubu ubuzima bw’umuherwe w’ikipe ya Leicester City ntiburamenyekana, gusa amakuru avuga ko yari ayirimo nk’uko ababonye ihaguruka babitangaje.

Mu gitondo cyo kuri iki cyumweru abafana ba Leicester babyukiye kuri Stade n’indabo, n’ubwo batazi neza abari bicaye muri iyi ndege bashobora kuba bayipfiriyemo.

Amakuru y’iyi mpanuka yahamijwe na’abanyamakuru ba BT Sport bari bari kuri iyi stade ndetse na Kasper Schimeichel usanzwe ari umuzamu wa Leicester City yayatanzeho ubuhamya ari kurira. Umuryango w’uyu muherwe kandi wemeje ko yari muri iyi ndege.