Tony Parker [ TP ] yasezeye kuri Basketball nyuma y’imyaka 18 ari muri NBA
Tony Parker wamenyekanye mu mpine nka ‘TP’ wakiniraga Charlotte Hornets yahagaritse gukina umukino w’intoki wa Basketball ku myaka 37 , akaba yari amaze imyaka 18 akina muri iyi shampiyona ya Basketball ikunzwe na benshi ku Isi.
Uyu mukinnyi w’umufaransa wamamaye mu mukino wa Basketball muri Leta Zunze Ubumwe za Amerika, abinyujije kurubuga rwa Twitter yavuze ko iki ari icyemezo gikomeye ariko igihe cyari kigeze.
“Mu marangamutima menshi mpagaritse gukina Basketball, rwari urugendo rudasanzwe!, Mu nzozi zanjye sinigeze ntekereza ko nzagira ibihe bidasanzwe nk’ibi muri NBA ndetse n’Ikipe y’Igihugu y’u Bufaransa. Mwarakoze kuri ibyo byose.”
Tony Parker cyangwa se TP yakiniye San Antonio Spurs imyaka 17, mu mwaka ushize aza kwerekeza muri Charlotte Hornets.
Hamwe n’Ikipe y’Igihugu y’u Bufaransa, Parker [TP] yatowe nk’umukinnyi w’umwaka i Burayi mu 2013 na 2014, anatsinda amanota menshi mu 2011 na 2013.
Yakinnye imikino 226 y’icyiciro cya nyuma muri NBA izwi nka play-offs aho nibura mu mukino yatsindaga amanota 17.9 agatanga n’imipira 5.1 yagiye ibyara amanota.
TP yatoranyijwe mu mikino ihuza abakinnyi b’intyoza muri NBA izwi nka All-Star Games inshuro esheshatu, aza mu ikipe nziza ya kabiri y’umwaka, inshuro eshatu,
Yegukanye ibikombe bine bya NBA ari kumwe na Spurs mu 2003, 2005, 2007 na 2014. Mu 2007 yatowe nk’umukinnyi wahize abandi mu mikino ya nyuma, NBA Finals MVP.
