Tanzania: Bashimagije Haruna Niyonzima bamugira umukinnyi wa mbere ku Isi
Umuvugizi w’ikipe ya Simba ikina mu cyiciro cya mbere muri shampiyona yo muri Tanzaniya yashimagije umunyarwanda Haruna Niyonzima ahamya ko muri Tanzaniya nta mukinnyi uzigera umuruta yewe ko ari n’umukinnyi wa mbere ku Isi.
Haji Manara , umuvugizi wa Simba abinyujije ku rubuga rwa Instagram rwe yavuze ko Kapiteni w’ikipe y’igihugu Amavubi ari umukinnyi udasanzwe mu mupira w’amaguru hariya muri Tanzaniya kandi ko ibyo yakoze nta wundi mukinnyi wari wabikora.
Yagize ati:” Haruna Niyonzima ni umukinnyi wa mbere ku Isi ubashije gutwara ibikombe bibiri bya shampiyona bikurikiranye mu makipe abiri atandukanye….. aka gahigo ntikigeze kabaho.”
Ikipe ya Simba iri gushimagiza Haruna Niyonzima nyuma yuko yatwaye igikombe cya shampiyona muri Tanzaniya kuko Young Africans bari bahanganiye igikombe ejo kuwa kane tariki ya 10 Gicurasi 2018 yananiwe gutsinda ikipe ya Tanzania Prisons mu mukino warangiye iyi Tanzania Prisons itsinze yanga ibitego 2-0.
Haruna Niyonzima yatwaranye na Young ibikombe bine bikurikiranye hanyuma aza kuva muri iyi kipe yari akunzwemo cyane yerekeza muri mukeba wayo w’ibihe byose Simba none naho ahatwaye igikombe , ibintu byatumye afatwa nk’umukinnyi udasanzwe muri Tanzaniya.
Niyonzuma Haruna akaba yarinjiye muri iyi kipe muri uyu mwaka w’imikino wa 2017/2018 aho yaje guhura n’ikibazo cy’imvune nyuma yo gukinira iyi kipe imikino mike ibanza ya shampiyona ubu akaba ari bwo arimo agaruka avuye mu mvune ndetse akaba yaranatangiye gukina.
Hashize iminsi itanu gusa Haruna Niyonzima ubwo yari mu Rwanda atangaje ko bizamushimisha ku buryo bukomeye nabona batwaye igikombe cya shampiyona y’igihugu cya Tanzinia ishuro 2 zikurikiranya mu makipe 2 atandukanye, icyo gihe haburaga imikino 3 basabwa amanota 3 gusa ngo bagitware.
Haruna Niyonzima ubashije gutwara ibikombe bibiri byikurikiranyije mu makipe y’amakeba, yinjyiye muri Tanzania mu mwaka wa 2011 mu ikipe ya Yanga Africans aguzwe muri APR FC aho yayifashije kwegukana ibikombe bya shampiyona bigera kuri 4 harimo n’icy’umwaka ushize, iki atwaranye na Simba n’igikombe cye cya 5 cya shampiyona ya Tanzania mu myaka igera ku 8 amazeyo.
