Sudan : Jenerali Hemeti yatangaje abari inyuma y’igeragezwa rya coup d’état

Amagambo ya Jenerali Mohamed Hamdan Dagolo, uzwi cyane ku izina rya Hemeti, akaba na Visi Perezida w’akanama kari ku butegetsi muri Sudan yavuze ko abanyapolitiki ari bo bo kwegekwaho igerageza ryo guhirika ubutegetsi ryaburijwemo ku wa kabiri w’iki cyumweru.

Jenerali Dagolo yavuze ko abasirikare be bagiye baburizamo amahirikwa y’ubutegetsi kuva uwari Perezida Bashir yahirikwa.

Aganira n’igitangazamakuru cya leta yagize ati:

“Abanyapolitiki ni bo mpamvu nyamukuru yihishe inyuma y’amahirikwa y’ubutegetsi kuko birengagije umuturage usanzwe… ahubwo bahangayikishijwe kurushaho no kurwanira uburyo bashobora kuguma ku butegetsi”.

Jenerali Hemeti yakomeje avuga ko obi byateje akababaro mu baturage ba Sudani.

Minisitiri w’intebe wa Sudan Abdalla Hamdok yari yavuze ko “abasigaye bo mu butegetsi bwabanje” bafite aho bahuriye n’uwari Perezida wahiritswe Omar al-Bashir, ari bo bihishe inyuma y’iryo gerageza ryo guhirika ubutegetsi ryapfubye.

Minisitiri w’ububanyi n’amahanga Mariam al-Sadiq al-Mahdi we yatangaje ko igisirikare cyabujije abasirikare bafite amapeti yo hasi gufata ubutegetsi kandi ko ibi ari ikimenyetso cyuko igisirikare gishishikajwe no kubahiriza inzibacyuho

Yavuze ko abari mu mugambi w’ihirikwa ry’ubutegetsi bari bafashe ahantu h’ingenzi ndetse aca amarenga ko bari bari hafi cyane yo gutangaza ko bahiritse ubutegetsi.

Yongeyeho ko bari bagerageje gutuma abatekinisiye bo ku gitangazamakuru cy’igihugu babatangariza ko bahiritse ubutegetsi ndetse ngo bakanacishaho umuziki wa gisirikare.