Spain: Barcelona yatwaye igikombe cya mbere cya La Liga na Xavi
Ikipe y’ Umupira w’ Amaguru yo muri Espanye FC Barcelone yatwaye igikombe cya Shampiyona ya Espanye izwi ku izina rya La Liga. Byemejwe bidasubirwaho ko yatwaye iki gikombe ubwo ku munsi w’ ejo Barcelona yasuraga ikipe ya Espanyol Barcelona maze Barcelona igatsinda Espanyol ibitego 4-1.
Muri uyu mukino w’ amakipe atuye mu Mujyi wa Barcelona waranzwe n’ ibitego byinshi kuko wabonetsemo ibitego 6 muri rusange birimo ibitego 4 bya FC Barcelona byatsinzwe na Robert Lewandorskyi ku munota wa 11 n’ uwa 40, Alejandro Balde watsinze ku munota wa 20 na Jule Kounde watsinze ku munota wa 53. Hanabonetsemo kandi ibitego bibiri bya Espanyol bitsinzwe na Juan Puado ku munota wa 73 na Joselu watsinze ku munota wa 92.
Barcelona yongeye gutwara igikombe nyuma y’ imyaka itatu idakora kuri icyo gikombe kuko yagiherukaga muri Shampiyona ya 2018-2019 bityo ikaba yujuje ibikombe 27 bya Shampiyona ya Espanye. Ibyo bikombe yabitwaye mu myaka ikurikira: 1944/1945, 1947/1948,1948/1949,1951/1952,1952/1953,1958/1959, 1959/1960, 1973/1974,1984/1985, 1990/1991,1991/1992,1992/1993,1993/1994,1997/1998,1998/1999,2004/2005,2005/2006,2008/2009,2010/2011, 2012/2013,2013/2014,2014/2015,2015/2016, 2017/2018, 2018/2019 n’ 2022-2023.
Iki gikombe FC Barcelona itwaye ni cyo gikombe cya mbere cya Shampiyona ya Espanye iyi kipe itwaye nyuma y’ uko Lionel Messi ayisohokeyemo akajya gukina mu ikipe ibarizwa muri Shampiyona y’ Ubufaransa ya Paris Saint Germain gusa iyo kipe ikaba igikomeje kugaragaza ubushake ko yifuza ko Messi yagaruka kuyikinira mu mwaka w’ imikino utaha wa 2023-2024 n’ ubwo iyi kipe iri kurwanira uyu mukinnyi n’ ikipe ya Al Hilal yo muri Arabia Saoudita. Iki gikombe ni nacyo gikombe cya mbere cya Shampiyona umutoza Xavi Hernandez Creus watangiye gutoza iyi kipe mu 2021.
