Rutahizamu Michael Sarpong yahembwe nk’uwahize bagenzi be muri Mutarama
Rutahizamu Michael Sarpong ukomoka mu gihugu cya Ghana, yaraye ahembwe nk’umukinnyi wa Rayon Sports witwaye neza kurusha abandi mu kwezi kwa mbere 2019.
Hari mu gikorwa ngarukakwezi cyo guhemba umukinnyi witwaye neza gisanzwe kimenyerewe mu kipe ya Rayon Sports. Ni igikorwa gisanzwe gitegurwa n’abafana bibumbiye muri Fan Club ya March Generation.
Michael Sarpong yegukanye iki gihembo nyuma yo kurusha amajwi bagenzi be bari bahanganye, barimo Niyonzima Olivier wegukanye icy’Ukuboza, cyo kimwe na myugariro Iradukunda Eric Radu.
Sarpong yahembwe amafaranga y’u Rwanda 100,000rwf nk’ishimwe, ndetse n’ibikoresho bitandukanye biriho ibirango bya Rayon Sports akinira.
Uyu mukinnyi yashimiye bagenzi be bamufashije kwitwara neza mu kibuga ari na byo yahembewe, ndetse anashima n’ubuyobozi bwa Rayon Sports budahwema kubaba hafi.
