Premier league: Man City isoje shampiyona ifite amanota 100, Chelsea ibura tike ya Champions league
Shampiyona y’umupira w’amaguru mu gihugu cy’Ubwongerereza yasojwe kuri uyu wa gatandatu, Manchester City yegukana igikombe cya shampiyona ifite amanota 100, Chelsea yari ifite igikombe cya shampiyona cy’ubushize yo inanirwa kuza mu makipe azakina UEFA Champions league.
Imikino y’umunsi wa nyuma w’iyi shampiyona yose yakinwe kuri uyu wa gatandatu 16h00, mu rwego rwo kwirinda uburiganya.
Ikibazo muri iyi shampiyona cyari kiri ku makipe agomba kumanuka mu cyiciro cya kabiri, ndetse n’ugomba kurangiza ku mwanya wa gatatu hagati y’ikipe ya Liverpool na Tottenham, dore ko Chelsea yo yavuye muri uru rugamba ubwo yanganyaga 1-1 na Huddersfiled Town ku wa gatatu w’iki cyumweru.
Iyi Chelsea ibyayibayeho uyu munsi nanone ni agahomamunwa, kuko yafashwe n’ikipe ya New Castle United ikayitsinda ibitego 3-0. Igitego cya Dwight Gayle na bibiri bya Ayoze Perez ni byo byafashije New Castle y’umutoza Rapha Benitez kurangiza ku mwanya wa 10 n’amanota 44, mu gihe Chelsea yarangije ku wa gatanu na 70, iyi ikazakina imikino ya Europa league.
Undi mukino wahuje Manchester United yari yakiriye Watford kuri Old Trafford. Igitego cya Marcus Rashford ni cyo cyafashije Manchester United kurangiza ku mwanya wa kabiri n’amanota 81, amanota 19 inyuma ya mukeba wayo Manchester City.
Iyi Watford yatsinzwe 1-0 yo yarangije shampiyona iri ku mwanya wa 14 n’amanota 41.
Undi mukino wabaye ni uwahuje Tottenham yari yakiriye Leicester City i Wembley. Uyu mukino warumbutsemo ibitego cyane kuko warangiye ubonetsemo 9, 5 ku ruhande rwa Tottenham na 4 ku ruhande rwa Leicester City.
Harry Kane warwaniraga urukweto rwa Zahabu na Mohammed Salah yatsinze ibitego 2 muri uyu mukino, Eric Lamela na we atsinda 2, mu gihe Christian Fuchs yitsinze ikindi gitego.
Leicester yo yatsindiwe na Jarmy Vardy watsinze ibitego 2, Ryad Mahrez atsinda 1, mu gihe ikindi cyatsinzwe na Kelechi Iheanacho.
Gutsinda Leicester byafashije Tottenham kurangiza ku mwanya wa 3 n’amanota 77, mu gihe Leicester City yarangije ku mwanya wa 9 n’amanota 47.
Manchester City yari yasuye Southampton kuri Saint Mary Stadium. Igitego cya Gabriel Jesus ni cyo cyafashije iyi kipe y’umutoza Pep Guardiola kuzuza amanota 100 muri shampiyona.
Southampton yarangije shampiyona iri ku mwanya wa 17 n’amanota 36, iberwa igitambo na Swansea yananiwe gutsindira Stoke ku kibuga kibuga cyayo ngo yigumiremu kiciro cya mbere.
Iyi Swansea yajyanye mu kiciro cya kabiri na Stoke City yayihemukiye ndetse n’ikipe ya West Bromwich Albion yashinyaguriwe na Christal Palace iyitsinda ibitego 2-0.
Muri rusange, Manchester City, Manchester United, Tottenham na Liverpool zizakina UEFA Champions league, Chelsea, Arsenal na Burnley zikine Europa league, mu gihe Swansea, Stoke na West Brom zizakina ikiciro cya kabiri.
Mohammed Salah wageze muri Premier league muri uyu mwaka yarangije ayoboye abatsinze ibitego byinshi n’ibitego 32, Harry Kane na 30, Sergio Aguero na 21, Jammy Vardy na 20, Raheem Sterling na 18, Romelu Lukaku na 16, mu gihe Roberto Firmino yarangije afite ibitego 15.
