Patient Bizimana na Gaby Kamanzi bishimiwe mu gitaramo bahuriyemo mu Bubiligi(Amafoto)

08/10/201708/10/2018 Teradig News

Patient Bizimana umenyerewe mu ndirimbo zo kuramya no guhimbaza Imana yakoze igitaramo yishimirwa bidasanzwe mu Bubiligi.

Ni mu ruherekane rw’ibitaramo arimo ku mugabane w’Iburayi, ku ikubitiro akaba yakoreye icya mbere mu Bubiligi. Iki gitaramo yahuriyemo n’abahanzi bakomeye barimo Gaby Kamanzi ndetse na Chorale de Sion.

Iki gitaramo cyabereye mu mujyi wa Bruxelles ahitwa Rue Birminghan 54, 1080 Bruxelles, kuri uyu wa gatandatu tariki 7 Ukwakira 2017. Cyari cyateguwe n’itorero rya Assemblee des Rachetes A.SB.L ku bufatanye na Chorale de Sion, kinaririmbwamo n’abandi bahanzi barimo Basirwa Mirelle na Nzinga Massamba.

Iki gitaramo cyahuruje abantu baturutse imihanda yose yo ku mugabane w’Iburayi bari baje kureba uyu munyempano mu kuramya no guhimbaza Imana umaze kwigarurira imitima y’abakunda indirimbo zaririmbiwe Imana.

Mu gihe Patient Bizimana azaba asoje ibitaramo ari gukorera mu Bubiligi , azahita akomereza mu bindi bihugu bitandukanye birimo Suwede , Finilande ndetse n’Ubufaransa.

Patient Bizimana yavuye mu Rwanda mu gitondo cyo kuwa Kane tariki 5 Ukwakira 2017 ahagana saa yine z’amanywa, yahagurutse ku kibuga cy’indege mpuzamahanga cya Kigali i Kanombe , yerekeza mu gihugu cy’Ububiligi.

Patient yageze i Kanombe aherekejwe na mukuru we bava inda imwe , Musoni Benjamin ushinzwe guhuza ibikorwa bya Moriah ndetse n’izindi nshuti ze za hafi.

Yageze mu Bubiligi kuwa 6 Ukwakira 2017 , ku kibuga cy’indege mpuzamahanga cya Buruseli yakirwa n’itsinda rinini ry’abagize Eglise Assemblée des Rachetés ari naryo ryari ryamutumiye mu Burayi ndetse banahise bamukorera ibirori by’umusogongero mu kumuha ikaze.