Olivier Giroud yaciye agahigo kari gafitwe na Zinedine Zidane mu kipe y’Ubufaransa

Rutahizamu Olivier Giroud ukinira ikipe ya Chelsea yaraye afashije ikipe y’igihugu y’Ubufaransa Les Bleus gukura amanota 3 kuri Les Oranges y’Abaholandi, anambura umwanya wa kane Zinedine Zidane mu bamaze gutsindira Ubufaransa ibitego byinshi mu mateka.

Hari mu mukino wa shampiyona ihuza ibihugu byo ku mugabane w’u Burayi wabereye Stade de France i Saint- Denis warangiye Ubufaransa butsinze ku bitego 2-1.

Kylian Mbappe ni we wafunguye amazamu mu minota ya mbere y’umukino, Ryan Babel yishyurira Abaholandi mbere y’uko Olivier Giroud atsindira Abafaransa igitego cy’insinzi ku munota wa 74 w’umukino.

Iki gitego Giroud wavuye mu gikombe cy’isi nta gitego atsindiye Ubufaransa yatsinze cyabaye icya 32 atsindiye iyi kipe, kikaba cyatumye afata umwanya wa kane mu bamaze gutsindira Ubufaransa ibitego byinshi ahigitse Zinedine Zidane banganyaga 31.

Abakinnyi barimo Thierry Henry watsindiye Ubufaransa ibitego 51, Michel Platini wabutsindiye 41 na David Trezeguet wabutsindiye 34 ni bo kugeza ubu baza imbere ya Olivier Giroud n’ubwo ibitego byinshi uyu mugabo yatsinze yagiye abitsinda mu mikino ya gicuti.