Nyuma ya Rayon Sports, USM Alger na yo yaciwe amande na CAF
Impuzamashyirahamwe y’umupira w’amaguru CAF, yamaze guca ikipe ya USM Alger yo mu gihugu cya Algeria amande angana n’ibihumbi 25 by’amadorali ya Amerika kubera uruhare bagize mu mirwano yakurikiye umukino wa CAF Confederations Cup iyi kipe yanganyijemo na Rayon Sports.
USM Alger yari yakiriye Rayon Sports ku cyumweru tariki ya 29 Nyakanga, mu mukino wo kwishyura w’amatsinda ya CAF Confederations Cup wabereye i Blida. Uyu mukino warangiye amakipe yombi anganya 1-1, gusa uza gusozwa n’imirwano hagati y’abakinnyi b’impande zombi.
Rayon Sports ni yo yabanje kuryozwa iyi mirwano, aho yategetswe na CAF kwishyura amande angana n’ibihumbi 20 by’amadorali ya Amerika kubera uruhare abakinnyi bayo barimo Yannick Mukunzi, Christ Mbondi na Kasim Ndayisenga bagize muri iyi mirwano.
2 muri aba bakinnyi kandi bahagaritswe imiino 2 y’amarushanwa ya CAF, na ho Yannick Mukunzi ahagarikwa imikino 3.
Nyuma yo guhana Rayon Sports, USM Alger na yo nk’ikipe yagize uruhare muri iyi mirwano yaciwe amande na CAF, ndetse na 4 mu bakinnyi bayo bafatirwa ibihano. Nk’uko CAF yaciye Rayon Sports amande igendeye ku ruhare rwa buri mukinnyi mu mvururu, iyi kipe yo muri Algeria na yo ni ko byayigendekeye.
Uwahombeje iyi kipe kurusha abandi ni uwitwa Benkhemassa, wahagaritswe imikino 3 ndetse akaba agomba no gutangwaho amande angana n’ibihumbi 10 by’amadorali.
Ubandi bakinnyi batatu ari bo: Benyahia, Bouderbal ndetse n’umuzamu Mansouri, aba bakaba bahagaritswe imikino 2 kuri buri umwe ndetse n’amande angana n’ibihumbi 5 by’amadorali ku bw’uruhare bagize mu mvururu.
Byumvikana ko iyi kipe imaze iminsi mu mwiherero muri Iraq izakina umukino ifitanye na Gor Mahia idafite aba bakinnyi, ndetse n’uwa Yanga Africans usoza itsinda itabafite.
