Muhire Kevin wa Rayon Sports yasezeranye n’umukunzi we (Amafoto)

Rutahizamu w’ikipe ya Rayon Sports, Muhire Kevin yasezeranye imbere y’amategeko na Cyuzuzo Delphine mu muhango wabereye mu Murenge wa Kimisagara kuri uyu wa Kane,tariki ya 14 Ukuboza.

Perezida wa Rayon Sports, Uwayezu Jean Fidèle na Munyakazi Sadate wayoboye iyi kipe, baherekeje Muhire Kevin wigeze kuba Kapiteni wa Rayon Sports.

Muhire Kevin yari amaze iminsi akinira iyi kipe mu masezerano y’igihe gito kuko yasinye gukina igice cya Mbere cya Shampiyona avuye muri Al Yarmouk yo mu cyiciro cya kabiri muri Kuwait.

Aya masezerano yasinywe ku wa Kane, tariki 12 Ukwakira 2023.

Bivugwa ko uyu mukinnyi umaze igihe atandukanye na Al Yarmouk yasinye amasezerano yo gusoza imikino ibanza ya shampiyona, kubera ko afite indi kipe yo hanze baganiriye gusa mu gihe bitakunda yakomezanya na Murera.

Muhire Kevin yazamukiye mu isonga yavuyemo ajya muri Rayon Sports ndetse agenda akina mu makipe yo hanze.