Mbasezeyeho ndagiye sinzi niba nzagaruka kubatoza-Olivier Karekezi
Karekezi Olivier wari umutoza wa Rayon Sports kuva kuwa 27 Nyakanga 2017, yamaze gusezera ku bayobozi, abakinnyi n’abafana ba Rayon Sports mbere yuko bakira Mamelodi Sundowns yo muri Afurika y’Epfo mu mikino Nyafurika ihuza amakipe yabaye aya mbere iwayo (Total CAF Champions League 2018).
Kugeza ubu umutoza Olivier Karekezi wari usanzwe atoza ikipe ya Rayon Sports ntakibarizwa ku butaka bw”u Rwanda yamaze gufata rutema ikirere yerekeza muri Swede aho nubusanzwe yabaga mbere yuko aza muri Rayon Sports ndetse umugore we akaba yari yaragiye mbere .
Ibi bibaye nyuma y’umukino iyi kipe yatsinzwe na APR FC ku cyumweru tariki ya 25 Gashyantare 2018 ariko Olivier Karekezi akaba yaramaze no guhesha ikipe ya Rayon Sports itike yo gukina imikino ya Caf Champions League mu cyiciro gikurikira aho Rayon Sports igomba kwakira Mamelodi Sundowns kuwa 7 Werurwe 2018 kuri sitade Amahoro.
Karekezi w’imyaka 34 yavuye muri iyi kipe nyuma yo gutsindwa na APR FC igitego 1-0 mu mukino wa shampiyona watumye amakipe yombi yuzuza imikino 11 muri uyu mwaka w’imikino 2017-2018.
Amakuru ava muri Rayon Sports avuga ko uyu mutoza yabanje guhura n’abayobozi b’ikipe bakarebera hamwe uko umusaruro uhagaze mu mezi arindwi ashize, bakaza gusanga bidahagaze neza ku buryo bakomezanya. Baje gusanga ahanini abafana ba Rayon Sports barababajwe no kuba mu byumweru bitatu bishise baratsinzwemo inshuro ebyiri mu mikino bahuyemo na APR FC.
Nyuma yo gusubira muri Sweden, ubu biravugwa ko Masud Djuma wahoze muri Rayon Sports agasiga ayihaye igikombe cya shampiyona mbere yo kujya muri Simba ashobora kugaruka agahabwa amasezerano mashya. Abandi bavugwa ko batoza iyi kipe ni Didier Gomez da Rosa na Ivan Minaert bose bakaba baraciye muri iyi kipe yambara umweru n’ubururu.
Kuva Karekezi yageze mu Rwanda kuwa 27 Nyakanga 2017, yafashije Rayon Sports gutwara igikombe cy’Agaciro Development Fund, batwaye igikombe cy’Intwari 2018, Itwara igikombe cya FezaBet na Super Cup 2018 batwaye batsinze APR FC mu mukino wakinwe inshuro ebyiri ku bibuga bibiri bitandukanye.
