Manchester United iri mu bihe bibi yasuzuguwe na ka New Castle
Ikipe ya Manchester United iri mu bihe bibi muri iyi minsi, yongeye gukorwa mu jisho itsindwa na New Castle United igitego 1-0.
Hari mu mukino w’umunsi wa munani wa shampiyona y’Abongereza amakipe yombi yari yahuriyemo ku kibuga St James Park. Amakipe yombi yahuye ahagaze nabi, dore ko yaherukaga gutsinda imikino ibiri yonyine mu 10 yaherukaga gukina.
By’umwihariko New Castle yaherukaga kunyagirwa na Leicester City ibitego 5-0, mu gihe Manchester United yari yanganyije na AZ Alkmar yo mu Buholandi, mu mukino wa Europa league warangiye nta shoti na rimwe rigana mu izamu Manchester United iteye.
Igitego cyo ku munota wa 72 w’umukino cyatsinzwe na Matthew Longstaff ni cyo cyafashije New Castle kwegukana amanota atatu.
Magingo aya Manchester United ihagaze ku mwanya wa 12 ku rutonde rwa shampiyona y’Abongereza n’amanota icyenda yonyine. Irarushwa amanota 15 na Liverpool ikomeje kuyobora shampiyona y’Abongereza magingo aya.
