Kiyovu Sports yatsinze Musanze FC iyiheza mu myanya y’inyuma

Umukino w’umunsi wa 15 wa shampiyona y’ikiciro cya mbere wabaye kuri uyu wa gatanu, ikipe ya Kiyovu Sports yatsinze Musanze FC ibitego 2-1 inayiheza mu myanya y’inyuma ku rutonde rwa shampiyona.

Ni umukino wabereye kuri Stade ya Mumena i Nyamirambo.

Kiyovu Sports yaje muri uyu mukino iheruka gutsinda Police FC Amagaju 3-0, mu gihe Musanze yaherukaga kunganyiriza na Bugesera i Nyamata 2-2.

Kiyovu Sports yakiniraga imbere y’abafana bayo yarangije igice cya mbere iri imbere n’igitego 1-0, cyinjiye gitsinzwe na Nizeyimana Djuma kuri Penaliti. Uyu musore waherukaga gutsinda Amagaju wenyine ibitego 3 yahise ayobora abamaze gutsinda ibitego byinshi kuko ubu amaze gutsinda ibitego 9. Ni ibitego anganya na Ulimwengu Jules wa Sunrise.

Ikipe ya Musanze FC yagarutse mu gice cya kabiri ishaka igitego cyo kwishyura, gusa Kiyovu Sports ihita iyicira imibare kuko yahise iyitsinda igitego cya kabiri. Ni igitego cyinjiye ku munota wa 54 gitsinzwe na Nizeyimana Jean Claude bita “Rutsiro.”

Musanze FC yabonye impozamarira ku munota wa 58 w’umukino ibifashijwemo na Kapiteni wayo Imurora Japhet bita Drogba. Ni igitego yatsinze n’umutwe ku burangare bw’abinyuma ba Kiyovu Sports.

Gutsinda uyu mukino byafashije Kiyovu Sports  kurangiza imikino ibanza iri ku mwanya wa kane ku rutonde rwa shampiyona n’amanota 26, amanota inganya na Mukura VS ya gatatu.

Musanze yo yagumye ku mwanya wa 13 n’amanota 12 yonyine. Uyu mwanya iyi kipe y’umutoza Ruremesha Emmanuel ishobora no kuwutakaza, mu gihe amakipe ya Kirehe na Gicumbi yaba atsinze imikino afite. Gutsindwa na Kiyovu kandi byashyize umutoza Ruremesha mu byago byo kuba yakwirukanwa kubera umusaruro mubi wugarije ikipe ye.

Cyakora cyo iyi kipe iracyafite umukino w’ikirarane igomba kwakiramo ikipe ya Mukura VS.

[team_standings 32825]