Kapiteni w’ikipe y’Igihugu ya Uganda yerekeje muri Kiyovu Sports
Ikipe ya Kiyovu Sports yamaze gusinyisha rutahizamu Emmanuel Okwi usanzwe ari Kapiteni w’Ikipe y’Igihugu ya Uganda ‘The Cranes’.
Emmanuel Okwi w’imyaka 28 y’amavuko, yasinye umwaka umwe muri Kiyovu Sports bari bamaze iminsi bari mu biganiro.
Saa kumi n’ebyiri z’umugoroba wo kuri uyu wa Gatanu ni bwo Okwi yerekanwe nk’umukinnyi mushya wa Kiyovu Sports.
Emmanuel Okwi uri muri ba rutahizamu bakomeye muri aka karere, yakiniye amakipe atandukanye yiganjemo Villa Sports Club y’iwabo ndetse na Young Africans na Simba Sports Club yakiniye mu bihe bitandukanye.
Yaje muri Kiyovu Sports nyuma yo gutandukana na Ittihad ibarizwa mu mujyi wa Alexandria mu gihugu cya Misiri.
