Kagere Meddie yafashije Simba SC kwegukana amanota 3 muri shampiyona

Rutahizamu Kagere Meddie yongeye guheka ikipe ya Simba Sports Club ayitsindira ibitego 2 byose yatsinze Mbeya City ari na byo byayifashije kwegukana amanota 3 mu mukino w’umunsi wa 2 wa shampiyona y’ikiciro cya mbere muri Tanzania.

Ni umukino waberaga kuri Stade nkuru y’igihugu cya Tanzania i Dar Es Salaam.

Nyuma yo gufasha iyi kipe akayitsindira igitego 1-0 iheruka gutsinda Tanzania Prisons mu cyumweru gitaha, Rutahizamu Meddie Kagere yongeye kwigaragariza abakunzi b’iyi kipe yiyita Intare abatsindira ibitego 2.

Igitego cya mbere yagitsinze ku munota wa 14 w’umukino, ku mupira wari uturutse ku ruhande rw’ibumoso utewe na Shiza Kichuya hanyuma Kagere ahita ashyira umupira mu rucundura n’umutwe.

Uyu musore wageze muri iyi kipe akubutse muri Gor Mahia yatsinze igitego cya kabiri nanone n’umutwe, ku munota wa 44 w’umukino. Ni ku mupira muremure wari uturutse iburyo kwa Asante Kwasi.

Ibi bitego 2 Kagere yatsinze byatumye ayobora abafite ibitego byinshi aho amaze kuzuza ibitego 3 mu mikino 2 ya shampiyona amaze gukina.

Uyu mukino ntiwigeze ugaragaramo kapiteni w’Amavubi Haruna Niyonzima.

Mu wundi mukino wabaye: Alliance Sports Club ikinamo Wai Yeka yanganyije 1-1 na African Lyon.