Iranzi Jean Claude yabonye ikipe mu Misiri

Rutahizamu w’ikipe ya Rayon Sports wari mu igeragezwa mu Misiri, Iranzi Jean Claude yararitsinze akaba yamaze gutizwa muri Sohag Sporting Club mu gihe kingana n’amezi 6.

Tariki ya 15 Mutarama 2020 ni bwo uyu musore yahagurutse mu Rwanda yerekeje muri iki gihugu mu igeragezwa ry’ibyumweru 2.

Uyu musore byari bitaganyijwe ko nyuma y’igeragezwa agomba kugaruka mu Rwanda tariki ya 30 Mutarama 2020.

Ku gicamunsi cyo kuri uyu wa Kabiri ni bwo inkuru yamenyekanye ko uyu musore yamaze gusinya amasezerano y’amezi 6 nk’intizanyo ya Sohag Sporting Club yo mu Misiri.

Iyi kipe ikaba ikina mu cyiciro cya kabiri mu gihugu cya Misiri. Iranzi Jean Claude yatangaje ko byose byarangiye yamaze gutizwa iyi kipe.

Amakuru avuga ko uyu musore yatijwe muri iyi kipe kugera muri Kanama 2020, nyuma ibaye ikimukeneye bazavuana ibe yamugura.

Sohaga SC muri uyu mwaka w’imikino iri ku mwanya wa 8 mu itsinda A mu gihe hari andi matsinda B na C, mu mikino 12 imaze gukinwa, ikaba ifite amanota 15, National Bank of Egypt ni yo iyoboye urutonde n’amanota 25.

Iranzi Jean Claude yinjiye muri Rayon Sports mu mpeshyi y’umwaka ushize nyuma yo gutandukana na APR FC yari imaze kumwirukana.