Inkongi y’umuriro yibasiye Pariki y’Igihugu y’Ibirunga ku Kirunga cya Muhabura
Burera: Inkongi y’umuriro yagaragaye mu gitondo cyo ku wa 14 Kanama 2026 muri Pariki y’Igihugu y’Ibirunga, mu Murenge wa Cyanika, Akagari ka Nyagahinga, ahagana mu ishyamba riri ku Kirunga cya Muhabura.
Abaturage batuye hafi y’iyi pariki bavuga ko inkongi yabateye impungenge, cyane cyane ko umuriro wagaragaye mu gice cyo hejuru cy’umusozi, ahantu bigoye kugerwa n’abashaka kuwuzimya.
Kanyabashi, utuye mu isantere ya Nyagahinga, yavuze ko abaturage bamenye iby’inkongi mu gitondo, maze bamwe bakagira uruhare mu bikorwa byo gutabara.
«“Twabyumvise mu gitondo ko umuriro watangiye muri pariki. Abaturage twahise tubimenya turatabara kuko ni ishyamba ritwegereye. Ikiduhangayikishije ni uko umuriro uri haruguru cyane kandi kuhagera biragoye.”»
Mukamwezi, undi muturage wo muri aka gace, na we yavuze ko inkongi ibahangayikishije bitewe n’akamaro Pariki y’Igihugu y’Ibirunga ifitiye ibidukikije, cyane cyane ku bimera n’inyamaswa biyibamo.
Inzego zitandukanye zahise zitabara
Umuyobozi wa Pariki y’Igihugu y’Ibirunga, Uwingeri Prosper, yemeje ko inkongi yabaye muri Cyanika, avuga ko amakuru yayo yamenyekanye mu gitondo.
Yasobanuye ko kugeza ubu hataramenyekana neza icyateye umuriro, ariko ko inzego zitandukanye, zifatanyije n’abaturage, zahise zitangira ibikorwa byo kuwuzimya.
Uwingeri yavuze ko kimwe mu byihutirwa ari ugukumira ikwirakwira ry’umuriro no kurinda ko wakomeza kwangiza ibice byinshi by’iyi pariki.
Nubwo ibikorwa byo kuwuzimya byari bikomeje, nta mibare yari yatangazwa ku buso bw’ishyamba bwari bumaze kwangizwa cyangwa ku nyamaswa n’ibindi binyabuzima byaba byaragizweho ingaruka.
Polisi n’abaturage mu bikorwa byo kuzimya umuriro
Umuvugizi wa Polisi y’u Rwanda mu Ntara y’Amajyaruguru, CIP Ignace Ngirabakunzi, yavuze ko Polisi, Ishami rishinzwe kuzimya inkongi n’ubutabazi ndetse n’abaturage, bahise bitabira igikorwa cyo guhangana n’iyi nkongi.
Yagize ati:
«“Iby’iyo nkongi twabimenye nka Polisi y’u Rwanda, Ishami rishinzwe kuzimya inkongi n’ubutabazi hamwe n’abaturage bihutiye gutabara. Kuri ubu hakomeje ibikorwa byo kuzimya iyo nkongi.”»
Abaturage bo mu nkengero za pariki basaba ko ubufatanye hagati yabo n’inzego zishinzwe kurinda ibidukikije bukomeza, kugira ngo ibikorwa bishobora guteza inkongi bitangweho amakuru hakiri kare.
Iyi nkongi ibaye mu gihe Pariki y’Igihugu y’Ibirunga yagiye igaragaramo inkongi mu myaka yashize. Mu mwaka wa 2017, na bwo habaye inkongi muri iyi pariki, ibikorwa byo kuyizimya bikaba byarakozwe n’inzego zitandukanye zifatanyije n’abaturage.
Kugeza ubu, icyateye inkongi yo ku wa 14 Kanama 2026 ntikiramenyekana neza, mu gihe ibikorwa byo kuyihashya no gukumira ko ikomeza gukwira byari bigikomeje.
