Ingabo za Ethiopia zambuye TPLF umujyi wo mu ntara ya Tigray ituyemo
Leta ya Ethiopia yatangaje ko ingabo zayo ejo ku wa Gatatu zafashe umujyi wa Alamata uri mu majyepfo y’intara ya Tigray isanzwe igenzurwa n’umutwe wa TPLF uharanira ubwiyenge bw’iyi ntara.
Itangazo ryasohowe na Guverinoma ya Ethiopia rivuga ko izi ngabo zafashe uyu mujyi zifatanyije n’iz’intara ya Amhara.
Iti: “Ingabo za Ethiopia n’inzego zishinzwe umutekano z’intara ya Amhara nyuma yo kwirukana umwanzi, zafashe umujyi wa Alamata.”
Iyu guverinoma kandi yavuze ko ingabo zikomeza urugamba zigamije gufata n’undi mujyi wa Tanqua Abergele nawo uri muri Tigray.
Iti: “Ingabo za Leta ya Ethiopia n’abashinzwe umutekano bo muri Amhara bari gusenya abakora ibikorwa by’iterabwoba bari guhungira muri Abergele.”
Ingabo za Ethiopia zikomeje gukurikirana abarwanyi ba TPLF bamaze gutangaza ko bavuye mu bice bari barafashe mu ntara ya Amhara na Afar kugira ngo habeho ibiganiro by’amahoro, gusa Leta yo yavuze ko atari cyo bagamije, ahubwo barimo guhunga kubera ko batsinzwe.
