Hiyambajwe za Penaliti ngo Manchester City itware Chelsea Carabao Cup

Ikipe ya Manchester City yegukanye igikombe cya mbere cy’umwaka wa 2019, nyuma yo gutsinda Chelsea kuri za Penaliti ku mukino wa nyuma wa Carabao Cup.

Ni umukino amakipe yombi yahuriyemo abenshi biteze kubona Chelsea yongera kunyagirwa na Manchester City, nyuma y’umukino wa shampiyona amakipe yombi yari aheruka guhuriramo Manchester City igatsinda Chelsea ibitego 6-0.

Iminota 90 y’umukino w’uyu munsi yarangiye amakipe yombi anganya 0-0.

Ni iminota yaranzwe cyane no kwiharira umupira ku ruhande rw’abasore b’umutoza Pep Guardiola, gusa ntibashobora gutsinda igitego mu izamu rya Kepa Arrizabalaga wa Chelsea.

Uyu Kepa kandi yagarutsweho na benshi nyuma y’uko umutoza Maurizio Sarri ashakiye kumusimbuza Willy Cabarelo bikarangira undi abyanze.

Ikipe ya Chelsea yatangiye ihusha penaliti ya mbere yatewe na Jorginho, bikarangira umuzamu Ederson Moraes ayikuyemo.

Penaliti ya mbere ya Manchester City yinjijwe neza n’Umudage Ikary Gundogan.

Penaliti ya kabiri ya Chelsea yinjijwe neza n’Umunya-Espagne Cesar  Azpilicueta, mbere y’uko Sergio Aguero atsindira Manchester City penaliti ya kabiri yatumye ikomeza kujya imbere ya Chelsea.

Umunya-Brazil Emmerson yatsindiye Chelsea penaliti ya gatatu, iya gatatu ya Manchester City yatewe na Leroy Sane ikurwamo n’umuzamu Arrizabalaga.

Amahirwe ya Chelsea yarangijwe na David Luiz wahushije Penaliti ya kane yagonze ipoto, mbere y’uko Bernardo Silva atsinda Penaliti ya kane ya City.

Penaliti ya gatanu ya Chelsea yatsinzwe na Eden Hazard, mbere y’uko Raheem Sterling yinjiza iyahesheje City igikombe.

Muri rusange Manchester City yatwaye Carabao kuri Penaliti 4-3 za Chelsea.